حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


"امبيه" ..كلمه تقال عند الدهشه من شئ مثير للشفقه او مثير للاشمئزاز او عند الوقوع في ورطه

" امبيه " ...مصطلح انثوي صافي ..يكثر بين الفئه العمريه دون الخامسه عشر ..و قد تسمعه بين الفينة و الاخرى عند بنات العشرين ممن يتميزن بسذاجه و نسبه من الغباء لا يستهان بها .

"امبيه " ...لفظه تقع تحت خانة الاعتقاد الخاطئ بين الاوساط النسائيه بانها تضفي نوع من الانوثه و الرقه على حديثهن.

على الرغم من اشمئزازي الصارخ من هذا المصطلح " الغبي" , الا انه في بعض الاحيان لا اجد في قاموسي اللغوي كلمه اكثر من " امبيه " لوصف بعض المواقف و الاحداث الحياتيه

امبيه رقم 1





انا من النوع الذي لا يستقر على نوع واحد من " مزيل للعرق " ..قد استمر على نوع واحد فتره من الزمن ..لا البث ان اعود لتجربة نوع جديد .. و في مره من المرات اشتريت " مزيل عرق " لم اجد له مثيل من حيث الرائحه الزكيه الفواحه او من حيث استمراية تأثيره على الجسم .

كنت فرح جدا من هذا الاكتشاف الجديد لدرجة انني في اول حديث لي مع صديقي الجالس بجواري في الدوانيه كان " انصحك تشتري ...... خوش "ديودرنت " " ...طبعا اكتشفت فداحة الموقف بعد هذا الرد من صديقي .." ليش تشم فيني ريحه ..عاد توني ماخذ شور "

الصراحه حاولت ارقع ما قدرت .


امبيه رقم 2





عندما اكون في حالة رعب ..او في حالة قلق شديد ..اتلفظ بالفاظ لا استطيع ان اتحكم بها ... لا تعكس شخصيتي و لا تربيتي .

في يوم من ايام الربيع ..كنت معزوم على عشاء في حديقة صديقي ..كانت العزيمه " محفوفه " ..كنا خمس اشخاص بما فيهم الداعي .

كنا مستمتعين بالطقس و بالاجواء الحميميه المحيطه بالجلسه ..لم يعكر صفو هذه الليله الصافيه الدافئه غير هذا الكلب القادم الينا هروله .. معلنا نباحه على القادمين الجدد ...لم يستطع صديقي كبح لجام هذا الكلب الهائج ..كون الكلب ملك لشقيقته ..و هي الوحيدة من تستطيع التحكم به .

و بسرعه استدعى صديقي شقيقته لانقاذ الوقف ..و بالفعل جاءت شقيقته على استيحاء و بحركه و خفه استطاعت ان تهدئ من هيجان الكلب.

ردة فعلي اتجاه شقيقة صديقي الصغيره كانت :-

" هذا جلب تربينه ...و بعدين مو لايق ..بنيه تربي جلب "


امبيه رقم 3



عندما اكون تحت ضوضاء مستمره و ازعاج ما له داعي ..اكون في حاله شر متوقد

قريبتي ذات الثلاث سنوات ..لم تشبع من قصصي ..و ما ان انتهي من سرد قصه حتى تلح علي بالمزيد من القصص ..." سامي قولي قصه ثانيه " .." حبيبتي قلتلج اربع قصص ..خلاص ما عندي قصه يديده ..يلا باجر انشاءالله " .

زادت وتيرة " الحنه " لدرجة ان ولد عندي نوع من الضغط ..ارتفع الضغط و انفجر بردة فعل :-

" انتي غبيه ما تفهمين ..قلتلج ما عندي قصص خلاص ذلفي من ويهي " ..و فعلا اذلفت .." يما سامي يقول عني غبيه "



21 التعليقات:

جــــبريت يقول...

ههههههههه امبية صج بس الموقف مال الدوانية صج امبية من بطنة,تسلم علي التدوين

سلة ميوّة يقول...

هاهاهاهههاهي
صراحة بوست رااااااااااااائع


عجيب من بدايته لي آخر كلم فيه:)

لدرجة اني رديت عليه وانا بنص الشغل:)


يعني من أول تعريف الأمبية

لي يما سامي يقول عني غبيه

وانا مندمجة وشاقة الحلج

الله يفرحك ويونسك مثل ماونست يوم خفارتي...

اما عن القصص:)

مرة بنت خالتي نامت عندي
ولازم اقولها قصة قبل النوم

قلت لها قصت ليلى والذيب...

بعد ابي بعد


الاميرة النائمة...

بعد بعد...


الذيب والعنزات الثلاث...

بعد...

صارت 12 بالليل
بنيتنا مانامت

اخر شي اذكره
اتقولي

شرايج انا اقولج قصه؟

هيهيهيهي بنص القصة نمت وحياتك:)


ياصباح الفلللللللللللل

BookMark يقول...

أمبييه طلعت شرير ;)

Princess Sara يقول...

هههههههه آمبيه !


موقفك الأول بصرآحه الله لا يحطنا فيه
بس في عيد ميلاد وحده من البنات و احنآ نفتح
الهدآيآ الموجوده لفت صاحبة الحفله "set" شاور جل
.. مزيل عرق .. شامبو .. و مسكينه ويههآ حممر
سألت صاجبة الهديه "ليش تحسين أحتاجهم ؟؟" بس حرام
الثانيه بررت الموقف أنهم من Dior!

:) آممم بصراحه أتفق معآك أحس الكلمه غبيه لوحده
بالعشرين .. بس فيه لهآ بديل؟ نقدر نشهق بس هذي امبيه من الـ level الأعلى يعني أمبيه حق "امبيه
طاح الصبغ عالأرض" ، آمآ الشهقه "أمبيه طاح الصبغ على جنطة أمي" !!

كسرت خآطري قريبتك :)
مفروض تقول "يمه سامي شرير"

مدونة حلوه
و بوست روعه
تحياتي

AM.SA.CHANNEL يقول...

في الإمارات لدينا كلمة مطابقة لكلمة أمبيه و هي
"أويه" .. فهذه الكلمة لا تضفي أنوثه أو رجوله لكلا العنصرين .. !!


أمبيه 1 :-

خخخخخ موقف لا يحسد عليه الصراحة، بس غريبه ما كنت تشم عمرك؟؟ و يمكن الخشم تعود ..
بس انا أحب اللي يقوولوون أحسن من اللي يتمون ساكتين .. على الأقل تتنبه قبل الوقت الضايع ..


أمبيه 2 :-

أويه وايد قويه جي تقول للبنت، حاول قد ما تقدر تربط لسانك، بأنك تتنفس بعمق 5 مرات، و عقب فكر إنك تتكلم .. صدقني بتتغير هاي الصفة فيك واايد ..

أمبيه 3:-

حليييييييييييلها هههههههههه ..

رورو الشخبوطة يقول...

انصدمت من المقدمه ..

واول شي طرى ع بالي اكتب برد امبيه خخخخ..

مال الديودرنت لازم تعطي مقدمات شككت الصبي بنفسه خخخ..

وشقالت لك البنت لو انا منها اهد الجلب عليك :p

وي وعليه كليت البنيه ماقالت لكم امبيه سوفاج خخخ..

مشكور بوست ممتع بس المقدمه لا :)

Engineer A يقول...

أمبيه!!!!!

صج مواقف لا تحسد عليها! :)

الزين يقول...

اييييه ياسامي
انت بنت تقول امبيه ممكن ابلعها مع بيرييه عشان اهضمها ولا تقعد على جبدي

بس لما ولد يقول لي امبيه هذي شلون اصرفها!!
احذفه ببطل البرييه مثلا

مسكين صاحبك شككته بروحه
وعلى طاري الجلب انا عندي خوووش جلبه
حبيييبه
صوتها اكبر منها
وغريبة عجيبة الأطوار
صاحباتي مسمينها الخروفة
لأنها من النوع اللي شعرها كثيف وطويل
والسبب الثاني لأنها تموت على الخضرة
تاكل رقي وفلفل بارد وتفاح وتحب البقدونس
واونس لعبه بالنسبه لها انك تعطيها حبة عنب
:)
مسرحية

اما عن الأمبيه الثالثه
فانا مثلك ما اقدر على الحنه والإزعاج
وافقد التركيز وممكن اتنرفز
بس حرام ترى كسرت بالبنت

:)

خوش بوست
خفيييف

ebtsamh يقول...

اعترض على المقدمة وبشدة !

عيل امبيه غبيه وساذجه .. مو كأنك مبالغ شوي ؟

اتمنى تكون مبالغ ..

والمواقف فعلا لو مرت علي ما رح اقول غير امبيه في

وصفها .. تدوينه دمها خفيف :)

Nikon 8 يقول...

موقف الديوانية ودي أسويه لوحده عاميه عيونا من ريحتها ... بس الفرق إني بسويه مزاح وطعن رماح !
عل وعسى ينفع معاها الله يهديها

q8-lawyer يقول...

الله يسامحك ياسامي :(

عيل بنات العشرين إلي يستخدمون مصطلح امبيه
يتميزن بسذاجه ونسبه من الغباء لا يستهان بها!!

جان رقعت وكتبت بعض بنات العشرين!!

((صج لقالوا العياب عند الباب))

عيبت على البنات >>>>

والله بلاك بامبيه رقم 1 و2 و3

Shaikha يقول...

لول ترى الكلمه عفويه تطلع!
مادري اشفيكم عليها p;

الجودي يقول...

:)


امبية مواقفك عمي ما اترقع الله يوفقك

كمبيوترجي يقول...

إليكم أمبيه رقم 4
المؤشر وصل للأحمر :)

حقوقي يقول...

لوووووول
بس صراحة الموقف الاول عجيب

بس صج شنو الديودرنت ما قلتلنا
انا نفسك من النوع اللي دايم احب اغير الديودرنت
ودايم احس اللي استعمله مو حلو وفي احلى منه

Sami يقول...

جبريت ...الله يسلمك :)

سلة ميوه ... هذا المطلوب :) .. نبي منج مواقف ظريفه مع المرضى .. و شلون قدرتي تشرحين جثه :)

بوك مارك ..امبيه ..بوك مارك تقول امبيه :)

Princess Sara....تسلمين ..بس موقف صديقتج اكثر فداحه من موقفي مع صديقي :)

AM.SA.CHANNEL ..لا .."اويه" اذرب من " امبيه" :)

رورو الشخبوطة .. هديتي الجلب علي !! طلعت مو بس انا شرير :)

Engineer A... تصدقين مهندستنا ..من كتب البوست و " امبيه " على لساني بمناسبه و من غير مناسبه

الزين ..متأكده الي عندج جلب ؟؟ المواصفات الي قلتيها تنطبق على ارنب :)

ebtsamh ...اكيد مبالغ :) ...بس في وايد مثلي يتنرفزون من كلمة " امبيه " و الدليل تعليق الزين :)

Nikon 8..خوفج تحطم نفسيا ..ميخالف استحملوا الريحه جود الله يهديها ..الله يعينج :)

q8-lawyer ...لوول انتي و ابتسامه استثناء من القاعده ..يحقلكم تقولون "امبيه" بالثلاث :)

Shaikha ...ضحكتيني ..ما ادري ليش حسيتج معصبه ..اهي بلشت دلع لين صارت عاده بشكل عفوي :)

الجودي ..بالمره ما ترقع :)

كمبيوترجي ..هذي الكويت صل على النبي :)

حقوقي ..بوقتها كنت ناسي شنو النوع الي مستخدمه ..لكن الحين استخدم "نيفيا" :)

أم الخــلـود يقول...

أمبيات غريبة أول مرة أسمع عنها .. تحياتي لك.


(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي كركر .. ويكتبون فوقها ..

(حملة الجـسد الواحـد)

رابط المدونة

http://krkr111.blogspot.com

جعله الله في ميزان حسانتكم .. آمين

بو ذياب يقول...

لوول الموقف الاول مو صج بس يعتمد على ميانتك مع الريال ... اذا اتمون عليه بتصير السالفة ضجك واذا ماتمون يمكن يحذفك بالطفاية :)

شاي الضحى يقول...

ههههههههههه

امبيه الموضوع عجيب :q

Sami يقول...

ام الخلود ... ما يصير خاطرج الا طيب ..بس لازم ابحبش اكثر عن الموضوع :))

بوذياب ... لا والله ما امون عليه :( .. فقدناك :)

شاي الضحى .. بسوي روحي ما شفت " امبيه" مالتج :))

غير معرف يقول...

السلام عليكم
العفو ، بس بغيت أنوّه للخطأ الشائع في لفظ الكلمة عنوان الموضوع ، الكلمة الصحيحة هي "أبّيه" ، وما في أي تهجِئة أخرى لها (أمبيه ، أمبيل ، ...)!
وشكراً