حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


يقول عن حكومتنا انها حكومه تعذب و تهين المواطنين ..نسى قبل شوي ماحط سايقهم طراق و كاسر خشمه ..بس لانه دعم بسيارتهم دعمه خفيفه

ماسكه موبايلها تحش و تحلطم على حكومتنا ..توقف السياره ..تنزل الجامه .. تقل زبالة السياره .. ترفع الجامه .. و تكمل طريجها ..و تكمل تحلطمها


نييب طاري النواب .."هذا ماخذ باناميرا و هذا معطينا مزرعه و هاذي موظفين زوجها" ... في جلسه حلوه تجمعنا في خوش مطعم بوقت دوامنا الحكومي

نستذبح علشان ناخذ اجازه طبيه ..علشان نغسل جبودنا بسفره او كشته ... مع هذا نظل نستنكر جذبات وزارة الداخليه

يطب بادارة حكومتنا .. و يقعد يتذاكى و يتفذلك ..و على مكتبه معامله صارلها شهر تحتاج توقيعه


و ايضا عبر " الواتس اب " وصلتني مشاعر المتبادله بين البنت و البنت و ايضا بين الشاب و صديقه

البنات :

الاولى : يلا حبيبتي .. وصلت

الثانيه :، يلا نازلتلج ياقلبي

الاولى :، أوكي حياتي ناطرتج

(و الله لا يراويك الحقد الي بينهم)


الشباب :

الاول : يالحيوان ترى أنا بره

الثاني : انزين انطر &$# بعينك

الاول : لا تطول يا الجلب

الثاني : جب

الاول : ييب وياك ماي

الثاني : اوكي

(ويظلون على قلب واحد)



نكشه اخيره

بما اني اعزب و الله الحمد و المنه , اضطريت استعين بصديق انقرد و تزوج علشان اعرف شنو راح ايسوي اهو زوجته بالاف المنحه
مصاريف المره
) جنطة كريسيتان لاكروا 600 د.ك
2) جلسة مساج " بانين تري" برويال حياة 50 د.ك
3) كريم ليلي و كريم نهاري و كريم داخل الجنطه و كريم بالسياره و كريم داخل الشغل 150 د.ك
4) بروش من لويس فتون 49 د.ك
5) بووت فرساتشي 150 د.ك
6) مواقف السياره 750 فلس
7) كسر خاطرها البنغالي 250 فلس

مصاريف الريال
1) تجديد اشتراك زوجته للمعهد الصحي 750 د.ك
2) استلام طلبية المانيا من الصيدليه 160 د.ك
3) فواتير مكالمات المدام 85 د.ك
4) باكيت زجاير 500 فلس حقه مو حق زوجته طبعا



وصلني عبر " الواتس اب " هذا الحوار الي يتم بعد صالون الحلاقه ..انقله لكم بدون تنقيح


الحريم


الأولى : الله ، قصيتي شعرج !! والله طالع يهبّل عليج ...

الثانية: صج ؟ بس حسيت يوم شفت نفسي في المنظره ..جنه منتفش !

الأولى : لا والله .. الا طالع يهبل ، وانا ودي اسوي نفس تسريحتج بس احس ان ويهي متروس شوي ولا تمشي معاي هالتسريحة ، واشوف انه ما يمشي مع ويهي الا هالتسريحة اللي تشوفيني دايم فيها .

الثانية : من صجج انتي !! شايفه ويهج شحلاته ، وتمشي معاه كل التسريحات وتطلع احلى بعد ، مو مثلي .. ما أقدر اختار الا تسريحه وحده تخلي الناس ما ينتبهون حق رقبتي اللي جنها رقبة زرافة .

الأولى : شهالكلاااام .. والله رقبتج حلوه ..وودي رقبتي مثلها عشان محد ينتبه حق جتوفي اللي جنهم جتوف لاعب كره قدم مو بنت

الثانية : صج انج مو صاحيه ، والله كل البنات اللي اعرفهم في الجامعة يتمنون جتوف مثل جتوفج ، لو لي جتوف مثل جتوفج جان ما اتبهذل لما اشتري ملابس يديده




الرياييل


الأول : نعيما ً ..

الثاني : الله ينعم بحالك





ياني ايميل يوضح الفرق بين الريال و المره

و انا بنقل لكم موضوع الايميل مع بعض الاضافات الخفيفه و بعد ما سويت عملية تكويت للاسلوب


شوفوا الريال لي بغى يسحب فلوس

1) يوقف السياره و يفتح الدريشه

2) يحط البطاقه و الرقم السري

3) يحط المبلغ المطلوب

4) يسحب البطاقه و الفلوس و الايصال و يتوكل على الله


الحين شوفوا المره لي بغت تسحب فلوس

1) تتعدى ماكينة السحب

2) ترجع قري شوي

3)ترفع السايد بريك

4)تنهي مكالمتها مع رفيجتها

5)تفتح جنطتها و تقعد دور و دور و دور لين تلقى بطاقة السحب

6)تفتح الباب علشان توصل ماكينة السحب

7) ادخل البطاقه

8) تحط الرقم السري .. يطلع الرقم غلط

9) تفتح جنطتها مره ثانيه

10) تدور الورقه الي كاتبه فيها الرقم السري

11) بعد جهد جهيد تلقى الرقم السري

12) تحط البطاقه مره ثانيه

13) تنقل الرقم السري

14) تقعد تفكر اسحب اميه و الا ميتين

15) تقرر تسحب خمسميه دينار

16) تعدل بكلتها او حجابها على ما تطلع الفلوس

17) تسحب الفلوس

18) تفتح جنطتها تدور البوك

19) تعد الفلوس و تحطها بالبوك

20) تتاكد من البكله مره ثانيه

21) تمشي نص متر

22) بعدها تتذكر انها ما خذت الإيصال

23) ترجع قري مع نظرة احتقار للسياره الي واقفه وراها

24) تاخذ الإيصال

25) ترد تتصل على رفيجتها

تكمل طريجها ..بعد ثلاث كيلوات تنزل السايد بريك


انا لما انعزم على ملجه محفوفه او عرس كبير

اكون متحفز و متزهب حق السؤال التقليدي الي اهو

يلا متى تزوج

لكن يظل في مواقف تكون فيها انت عاجز عن الرد ..و لسانك يربط من شدة هول الموقف

انا صارلي موقفين كانت فيها ابتسامتي الصفرا اهي ابلغ رد

مره كنت معزوم على ملجه محفوفه

وصلت متأخر شوي ..دخلت الكل كان قاعد

واحد من الموجودين ... علق بصوت عالي يسمعه الجميع

يلا سامي ..الملاج موجود ..فرصه تزوج الحين

رد الثاني .. اي عاد و النعم فيه سامي الكل يتمناه ...( لي هني ممتاز انا حدي منشكح و مستانس )

كمل كلامه ...و الله لو سامي بنت جان تزوجته ...( هني انا انا شرقت بريجي .. و قمت اكح كح ..الحبيب قصده يمدحني )


الموقف الثاني شيبه بالاول

كنت زاير يدتي الله يحفظها .. مشتهي اتريق معاها

و هناك لقيت يدتي مع صديقاتها

انا قاعد اسولف مع الي على يميني ..لكن اذني رايحه على سوالف يدتي مع صديقتها

يدتي: ترا فلانه ولدت ..يابت بنت

صديقتها: هو مو توها والده ..يايبه ولد

يدتي: اي هذا الثاني

صديقتها : اهي مو كبر سامي

يدتي: اي ..لو سامي بنت ..جان تزوج و عيل بعد

عقبها انسدت نفسي عن الاكل :(