Sewalefyal@
صفحة الفيس بوك
عدد الزوار (Unique)
قائمة المدونات الإلكترونية
-
بِك يا الله ..قبل 3 أسابيع
-
مرحلة بلا طعمقبل 10 أشهر
-
طوفان الأقصى ثورة عالميةقبل 11 شهرًا
-
التمسك بالأملقبل عام واحد
-
-
-
-
-
إلى أين أنت ذاهب يا "شيخ "بالله عليكقبل 5 أعوام
-
-
-
-
-
رسايل لـ مي عز الدينقبل 6 أعوام
-
رمضان طب علينا، من العطش ياويلناقبل 7 أعوام
-
-
السكوت علامة الرضاقبل 7 أعوام
-
سلمان الفاتح!قبل 7 أعوام
-
المشاركة والمقاطعة.. وجماعات المعارضة.قبل 8 أعوام
-
وقد بَطُلَ العجب... !!قبل 8 أعوام
-
-
زائر الليل ..قبل 8 أعوام
-
باص الحكومة و قطار القطاع النفطيقبل 8 أعوام
-
كاريكاتير مابعد أسعار النفطقبل 8 أعوام
-
صديقي... الشيخقبل 9 أعوام
الأحد, يونيو 06, 2010 | 
مرسلة بواسطة
Sami
بوك مارك وجهت سؤال محدد ... ما هي القشه التي قصمت ظهر البعير ؟ و الجواب بكل بساطه
الساعه التاسعه مساءا
معزوم على مطعم لبناني " Cafe Blanc " و مخطط أكل تبوله على ورق عنب على شوية حمص و متبل
تتفاجأ
ان الخطه تغيرت في اللحظات الاخيره ..العزيمه صارت على مطعم هندي "اشاز" و تتغير معاها المنيو الي في بالي
عيش زعفران..كاري الربيان ...سمبوسه خضره
ارجع البيت مصاب بالتخمه ...اتقلب على السرير يمنة ويسرة ..احاول عبثا ان اصطاد النوم
يرفع المؤذن صوته بالأذان معلنا بدخول صلاة الفجر
و فجأه
ينكت علي النوم بدون مقدمات
و على الساعه 7:15 استيقظ مفزوع
و بسرعه بسرعه اغسل ويهي و افرش اسناني و اخذ شور(ي) و البس دشداشتي و دلاغي و جوتيي و قحفيتي و غترتي و عقالي و اصلي الصلاة الي فاتتني
الساعه 8:15 ادق سيارتي سلف ( هذا في حال بسرعه بسرعه )
بوسط الزحمه اداحر هذا و اطق هرن حق هاذي و اسب هذيج و تفل بويه الي هناك
و بعد هالمجهود الجبار اوصل الدوام الساعه 9 ( متأخر ساعه و نص عن الدوام)
اوصل لموزع المصاعد ..و هناك اصادف رئيس مجلس الاداره ..طول السنه ملتزم بالدوام
يعني "حبكت" شفته يوم تأخرت
سلام و ابتسامه
ترتفع وتيرة الاعصاب عندي
و علطول اتوجه لمكتبي ..و اكتشف ان مديري داق على المكتب ثلاث مرات
يا ساتر
ارد اتصل عليه ما يرد ..اتصل مره ثانيه ..هم مطنش.. و بعدين
و فجاه ( اليوم مشحون بالمفاجأت)
يدخل علي سكرتير مديري يطلب مني بسرعه اروح لغرفة الاجتماعات
اووو نسيت اليوم عندنا اجتماع مع الشركه " الافلانيه"
غرفة الاجتماعات ..ظلمه و البروجكتر شغال ..ادخل بهدوء اسحب كرسيي و اقعد
اتجاهل نظرات مديري الحاده و التأنيبيه
خلص "السمنار" ..انحاش المكتب مره ثانيه ..متجاهل للمره الثانيه مديري العزيز
يرتفع اكثر و اكثر منسوب "العصبيه" عندي
يتصل مندوب الشركه يطلب مساعدتي
يا بشمهندس ..ارجوك ده مدير ادارة بلدية الاحمدي ..انت الي لازم تدخل عليه
بص المعامله مش حتتحرك بدون " غتره وعأل"
ارضخ للامر الواقع ..و اطق الطريج من شرق لي الصباحيه
و هناك اشوف العجب العجاب
الضغط يزيد اكثر فأكثر
و من الصباحيه ارجع شرق بخفي حنين .. وكلمة المندوب تدور في بالي " الله انت ما عملتش حاجه"
و هناك اغلق باب المكتب علي و اقعد اتعوذ من الشيطان لين ينتهي الدوام
الساعه 4 عصرا اوصل البيت
الاهل مسافرين و ماكو الا الخدم
تستقبلني الخدامه بويه اصفر ..و بموجه من الكحات
" انا واجد مريضه "...ليش ما رحتي مع السايق .." اليوم في عطله"
اخذها لمستوصف المنطقه ...انطرها بالسياره
ساعه ...ساعه و نص ..ساعتين ..ما بقى شي على صلاة المغرب
اوصل للبيت قبل صلاة المغرب بربع ساعه
و بداري انسدح ..انطر الاذان ..ياتي الاذان ..انام
اقوم مستعسر على صلاة العشاء ..اصلي المغرب و العشاء ..الله يسامحني ..اول مره اطوف صلاتين في يوم
انطر رفيجي يمرني
وفي الموعد يتصل صديقي ..سامي حبيبي راح اتأخر خمس دقايق
و يكون ريدي من النوع
انت ما تستحي على ويهك ..ما تحترم المواعيد ..الشره علي الي قاعد انطرك ..اذلف ذلفك الله ..بس هونت ماني طالع
يرد صديقي
شدعوه كلها خمس دقايق
ملاحظه
الاحداث حقيقيه لكن مو في يوم واحد ..حبيت اضغطها بيوم علشان اوصل فكرة بوك مارك
14 التعليقات:
بس قريت البوست احس تعبت نفسيا
يا ساتر
الحمدلله هالأحداث مو بيوم واحد
جان 6 حبات بندول ماتوقف الصداع
تصدق هالأحداث إلي كتبته تصير معانا وااايد
كله ركضه بركضه بهالدنيا
يوووووه صدعتني الله يسامحك :/
بس اشوه مو بيوم واحد
بس تدري والله مرات تصيرلي اكثر من جذي بيوم واحد
احس صج صج صج صج نفسيتي خلااااص بالحضييض
بس كل ما توصل جذي احط ابالي كلمة جدا مفيدة
"التعب منسي"
وفعلا هذا اللي يصير
بعد كل تعب ، اقوم ثاني يوم نااااسي كل التعب
وتمشي الحياة
لان فعلا التعب منسي :)
سامي صارت فيني معاك كذا مرة
مادري ليش وقتها كنت اخاف منك لدرجة اني اتخيل انك بتكوفني وتدوس في بطني .
مرة ثانية كلا اطلع معاي علشان ماتاكل من مطاعم ثجيلة .
بيتزا اكسربس وانقز ( امس دابه كبسة في مطعم المملكةالي في المهبولة مع ضيف سعودي)
سامي....
حياك الله في عالمنا
عالم القصة القصيرة...
جد اكلمك..
قصتك..قصيرة...ونيسة ...وواقعية لأبعد درجة
وبلهجة عاميه خلتني أتخيل صوت واحد قاعد يمي يتحلطم...:)
واتخيلك عند مستوصف السرة واقف واطق على السكان وانت طفران اطالع الرايح والياي
( ليش السرّة ) مادري:)؟
خيالي واسع شسوي...
امممم مر علي يوم من هالأيام.....
:)
وكان ثجيل ...الفرق بيني وبينك إني أوصل مرحلة أنهار وأبجي:)
مسّاك الله بالخير والنور والكرامة
اليوم من يبدي عوي يستمر بعويته لين نطق الطوفه ويتعدل من نفسه !
هذه حال الحياة
حظ أوفر المرة الثانية
مسكين جت على الصديق اللي تأخر خمس دقائق ؟
لووووووووووول
ماشاءالله توقعتك اصغر من انك تشتغل ..
واللي لفت انتباهي بالسالفه كلها..
ساعه تبدل وتغسل وتصلي !! ماجنه وايد..
وموفق يارب..
وبالعافيه :)
اوف اوف !!
كل هذي قـشـة !!
ماعليه .. كل واحد فينا عنده يوم نحس بالشهر عالأقل :)
اخنقتني العبرة!
اكثر شي نرفزني "سالفة المستوصف"
ما اتعزز الا حق دكاترة المستوصف والهنود اللي رايحين ورادين عليهم على ادناة الدون!
المفروض يفصلون صيدلية المستوصف عن استشارة الطبيب
يعني اللي حاس انه متكسر وتعبان ومتحزور على الصيدلية الخاصة يروح صيدلية المستوصف بدون لا يدش على الطبيب على سبب تافه!
ترا قاعدة اتكلم بشكل عام مو قاعدة اخص احد
نرجع حق البوست -بعدي ريظة-
:)
على كثر ما اكره المطاعم الهندية بشكل عام واشاز بشكل خاص... بس عندهم حلو ما ينعاف اسمه -راس مالاي-
يعدل المزاج ويفرد الظهر... حتى جبال الالب ما تقصمه
بعيد الشر!
كله كوم ومشوار الصباحية كوم ثاني ..
كتبت منذ أسابيع في مدونتي .. يوميات شبيه بالتي كتبتم .. مزجت فيها أحداث متفرقة ..
الفرق أن هنا مأساة موظف وهناك معاناة طالب .. أتمنى لو تطلعوا عليها ..
البوست كان بعنوان:يوميات صورية
she is me
واي مي ... اعتذر منج :
لوير ... لا تحدث الا في الافلام الهنديه :)
حقوقي ..النسيان نعمه ما يقدرها الا الي يمر هالاحداث ..يا ليت تكتب تجربتك :)
رامي ..المهبوله !! جود اسألك شسم هالامنطقه ..شنو راح يكون ردك ..مهبوله ..والله فشله :)
سلة ميوه ..لوول ..كنت قاعد اطق طق بالاي فون ..قزرت معاي :)
نيكون ... الله كاتب له تكون القشه من نصيبه ..بس الحمدالله ان القصه خياليه ..جان ردة الفعل اقوى من جذي :)
رورو الشخبوطه ... انا بدون مبالغه استهلك على اقل تقدير ساعه و نص اتزهب حق الطلعه :)
بوك مارك... لا تمت القصه الى الحقيقه بصله :) ..الاحداث واقعيه لكن مجتزئه ..بعضها حدث من سنه :)
جندل...لوول .. عجيييب "راس مالاي" .. على قولتج "يعدل المزاج ويفرد الظهر... حتى جبال الالب ما تقصمه"
she is me ...استمتعت وايد :) ..ذكرتيني بأيام كلية الهندسه و بالتحديد 6خ .. ذكرتيني بالدراسه و الانتخابات و الدكاتره
ساعه ونص تتزهب حق الطلعه!!
إن شالله إذا تزوجت ماراح تمل وتنقع وإنت ناطر المره على ما تجهز لأنكم بتخلصون بنفس الوقت ماكو نطره
رب ضارة نافعه
لووووووووووول
لوير ...انا لؤطه :))
إرسال تعليق