حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


استنفرت بعد اتصال الموظفه ..لتبلغني ان اليوم اخر يوم لحجز مقعد للامتحان المزمع انعقاده بعد ثلاثة اسابيع من الان

و على وجه السرعه جمعت اوراقي و عبيت بياناتي الشخصيه

و طيران توجهت للمعهد

وهناك قدمت اوراقي قبل ساعه من انتهاء دوامهم الرسمي

تفحصت الموظفه الاوراق المطلوبه و اكتشفت اني ناسي ارفق صورتين شخصيتين

اعتذرت الموظفة بكل برود عن قبول طلبي

حاولت اقنعها اني باجر راح اييب الصور ..لكن للاسف ما وافقت

قررت اني اعالج هذا الموقف بالطول او بالعرض

الحل اني اسابق الزمن و ارجع بالصور خلال ساعه

سألت الموظفه عن اقرب " استديو تصوير " .. ما عطنتي لا حق و لا باطل

طلعت "مدوده" جني واحد من المتسابقين في برنامج "كنز"

توني بتصل على واحد من الشباب ينقذني من هالورطه .. و لا الجح لكم ذاك المحل الي تهيالي من الوهله الاولى انه مطعم سمبوسه ..لكن و الله الحمد و المنه طلع استديو تصوير

صفطت السيار جدام المدخل ..وقبل لا انزل من السياره ..لا حظت عيون تلاقط علي من داخل الاستديو

حسيت نفسي اني نازل عليهم من السما .. و اني اول زبون مر عليهم من شهر او كثر

المهم

بس دخلت ..تفاجأت من قذارة المكان ..السقف مبطط ..الطوف ضاربه لون اصفر ..السجاد متروس بقع ..ريحة اعطنه..و كراسي جلد مغبره و مشققه بالاطراف

و ثلاث بنات ورا طاولة الاستقبال ..كل وحده كشرتها تارسه الويه

الصراحه ما قدرت احدد جنسية البنات على الرغم اني ضليع باللهجات

كانت لهجتهم مهجنه ..خليط من اللهجات ..كويتيه على سوريه على فلسطينيه مع لمسه عراقيه

اشكالهم

و حده شعرها مدهن ..الثانيه شعرها متفحم من الصبغ ..الثالثه لابسه حجاب على شكل وزار شبيه بوزار واحد من الربع يلبسه بالشاليه فوق الشورت لي بغى يصلي

شرحت لهم مشكلتي ..و طلبت منهم بسرعه يصوروني علشان يمديني ارجع اقدم الصور

طلبت ام شعر مدهن اصعد فوق

فوق كان الوضع مريب ..غرفه خاليه ما فيها الا كرسي و قطعة جلد ابيض ..خلفيه للصوره ..حتى منظرا ما لقيت .. الاغرب ان حتى الكاميرا مو موجوده !!

صعدت ام شعر مدهن ماسكه الكاميرا بديها ..طلبت مني اقعد عدل ..افرد اكتافي ..ابتسم

جكجكت جم صوره ..ما عجبها الوضع

و بشكل مباغت حطت ايد على ظهري و الايد الثانيه على جتفي ..يعني تبي تساعدني اقعد عدل

و بحركه بعيده كل البعد عن اللباقه لمست خدودي ..يعني تبي تشجعني ابتسم عدل

جكجكت مليون صوره ..هذا و انا طالب بس اربع صور

نزلت قبلها


الحين ابيكم اتخيلون الموقف ..ها.. جاهزين


ام شعر متفحم قالتلي و الابتسامه ما فارقت محياها ...شفيكم طولتوا فوق ؟

رديت..نعم ..قاعد اصور

ردت.. كل هذا تصوير

ام حجاب "وزار" .. ماتت من الضحك

انا ما قدرت استوعب الموقف الا بعد ما نزلت ام شعر مدهن و اهي تسب فيهم و تجعم فيهم و اهي تضحك

سويت روحي مو فاهم مقصدهم

بلهجه صارمه مني طلبت منهم بسرعه يعطوني الصور ...ما عندي وقت

ام شعر مدهن اطلبت رقم تلفوني

انا ..ليش ؟

ام شعر مدهن ..نستخدمه " ريفرنس" اذا بغيت نسخ من الصور بالمستقبل

رفضت و طلبت النسخ الاربعه ..و ان تمسح كل صوري من ذاكرة الكمبيوتر

انهيت المهمه بسلام و انا افكر بحال هالبنات ...شنو الظروف الي عاشوها خلتهم يتصرفون مثل هالتصرف القبيح



خارج الموضوع

مو يطلعلي واحد موشايف خير ..يسألني عن عنوان الاستديو


23 التعليقات:

why me يقول...

LOOOOOOOOOOL


مو صج الموقف

ولمن تقول ام شعر مدهن ولا ام شعر متفحم احسك تسب سب واهو مجرد وصف

لووول




بس موشي ان البنت اللي اللي تلمس الريال
وكلش الطريقه مو حلوه


انا وانا اقرا البوست


استحيت والله


شنو هذا
@@


استغفرالله

زين تسوي انك مسحت الصور ولا عطيتهم رقم تلفونك

BookMark يقول...

هالموقف مايبيله أمبيه

اهني يقولون:
ويييع :/

الزين يقول...

@@

.....

ما عندي تعليق

Princess Sara يقول...

آمبيه < شغل تطفر

لا و الله مو من صجهم
فشله!
صج على قولة بوكمارك ويييع
قلت بينهم لهجة كويتيه
و هذي شكو تسألك شتسوون,
صج صج صدمتني!
لو أنا منك رحت المعهد عطيتهم الصور و
رديت زفيتهم!
و زين انك ما عطيطتهم رقمك
قال رفرنس قال .. الا ترقيم و عيني عينك بعد!

غير معرف يقول...

قلتلي أي معهد ؟؟

":)

Princess Sara يقول...

^ تعال لو معطيهم رقم شغآلتكم
و يآ حبذآ تكون هنديه علشان تنخلهم
نخآل :) < مجرد فكره..

chandal/danchal!! يقول...

لووووووووووووول بعد يعرفون ريفرينس!


زين اللي ما تبلوا عليك... الله يكافينا الشر

سلة ميوّة يقول...

ياتني حجة وانا اتخيل الموقف
واتخيل دهنها...وووع..


بروح اسبح وارجع ارد...اعوووذ بالله

سلة ميوّة يقول...

عودة:)


مساك الله بالخير
وخطاك السو بعد هالموقف البايخ...

عاد تدري...


الحين رجعت اقرا وقاعده افكر باللي قلته...


اتصدق...
انا شغلي يلزمني ألمس الناس وايد
وبيني وبينك بالخفارة أكون مدودهة وماعندي وقت للذرابه والاستئذان...

اتهقى الناس بيحطون في بالهم اني قليلة ذوق ودفشة؟؟
والا بيفكرون اني قاصدة شي...

ترى انا قاعده افكر بصوت عالي..نبهتني على هالشغلة.... يبيلي شوي أتنبه بالتعامل...



نرجع حق البنيات...
والله وانا اختك بنات هالايام مايعتازون ظروف ...

ما اجمع ..بس الغالبية..
ووعموما ..ألله لايحطنا بمكانهم

بس اعتقد لو شنو ظروفي احترامي افرضه قبل أي شي....

وقذارة المكان كان راح يشفعلها تعامل صح...

بس قذارة و لوعت جبد بوقت واحد..الداد..



جني قرقت؟؟؟


مسى الميوة

الجودي يقول...

وصفك للمكان وايد قذر بقع على الزولية و الطوفة

والريحة العطنة لأ مو طبيعي

طبعا البنات و مواصفاتهم و تصرفاتهم

الله المستعان بس ..

الواحد ما يقول إلا لا حولة ولا قوة إلا بالله ..

شارع الجهرا يقول...

الله يعينك وحيل فيهم قلت لهم يمسحون الصور ...أعوذ بالله الله يرفع عنهم وين قاعدين ..راحت أيام الحيا والأصالة والستر ..الله يرحمكم يا حريم أول

Shaikha يقول...

هني ما ينقال " امبيه " !
ينقال ..
" واي قطيعه .. هلاقه "
أو "سوفاج" ، في رواية أخرى
p;

لول صج الي اختشوا ماتو !

q8-lawyer يقول...

هذي الهلاقه بعينه وعلمه

لووووووووووووووووووول


سامي حسن النيه يمكن فرحانين بدخول أول زبون

ولما طولت فوق فرحوا إنك زدت عدد اللقطات

؛p

نجــــري يقول...

هههههههههه مو صج

رورو الشخبوطه يقول...

امبيه ماتوصف الموقف..

وخزااياه اضبط ..

قطع جليلات حيا..

واللي ماسكتك جان عطيتها كوع ..

انا من بلوقك بصير مصارعه خخخ..

اهم شي تاكدت انه مسحوا الصور اخاف باجر نلقاك مبتلش فيهم الله لايقول ..

ومشكور..

حقوقي يقول...

لووووول صراحة موقف غريب
بس مغامرة حلوه لووووول

mazyona يقول...

لووووووووووووووول
موقف صج موقف

Engineer A يقول...

لوووووووول


عجيبة اسماء البنات ام شعر مدهن ام حجاب وزار ...الخ :))

والله مادري شقول شاحجي؟! ما اقول الا "أمبيييييييه" << يعني still ترى انا بالعشرينات ! :))

غير معرف يقول...

وييييييع وااي ذكرتني برووحي انحط بموااقف بايخااااا :S

وصج زين سويت انك ماعطيتهم رقمك لو انا منك اتنح واعطيهم رقمي < هبلة

غير معرف يقول...

ههههه
امبيه احس انت نوعك دايما تطيح بهالمواقف
اتخيل ويهك اول ما دشيت
مو صج

Sami يقول...

واي مي ....انا مو باط جبدي الا ام حجاب "وزار" :)

بوك مارك .... في موقف صارلي حول السنه ..ينطبق عليه كلمة "ويع" :)

الزين ...ما الومج :) ساعات السكوت ابلغ من الكلام :)

Princess Sara ..ما يسوى تتبلا علي .. متحسف على الربع دينار الردود :)

غير معرف ... حلو منك :) ..حاول مره اخرى

جندله ... شفتي شلون ..اي هذا الي كنت خايف منا بس الحمدالله الله ستر :)

سلة ميوه ... شتان بين الاثنين ..انتي دكتوره ..يطلب منج تلمسين المرضى ..الاستئذان بهالحاله شبه ..لا بالعكس خلج على طبيعتج ...اما اهم ا اقصاهم " فرونت ديسك " و" مصوره درجه رابعه" ..على اي اساس يلمسون الزباين ...الله يكثر من امثالج :)

الجودي... ما ادري شلون متحملين يعيشون تحت هالظروف ..و لا شقاصرهم ثلاث بنات ..ما يقدرون يمسحون الغبره عن الغنفه ..شدعو :)

شيخه ...لووول ..انا كل ما اسمع "قطيعه" اضحك ..فيها نوع من الاحتقار ما تماثلها كلمه ثانيه باي لغه :)

لوير .. والله كلشي جايز :)

نجري ...اهلا و سهلا

رورو الشخبوطه ...الله يهداج ..خليتيني اوسوس :)

حقوقي ...مغامره نهايتها سعيده ..الحمدالله :)

شارع الجهرا ... اختلف معاك ..بنات الحمايل ما يطلع منهم هالتصرف .. و اهم الغالبيه

مزيونا .. نعيش و نشوف :)

Engineer A ...مصره على "امبيه" :)

غير معرف ... اعجبج بهالمواقف :)

غير معرف ... بالاونه الاخير ..كل طاقتني البوهه :)

غير معرف يقول...

الصراحة الموقف ينرفز
تخيلت لو ريلي اللي صاير معاه جذي و ارتفع ضغطي
:)
بس جان زين زافهم علشان يخافون يعيدونها مرة ثانية

Sami يقول...

راح اكون انا الخسران ..اسهل ما عندهم يتبلون علي :)