سوالف يال

جلب بوليسي

بعد مرور يومين .. وبعد الدوران في حلقة مفرغة .. رجعت لنفس المراقب الي تيقنت ان معامتلي عنده

الا الحبيب حاطله عزكم الله جلب بوليسي على باب مكتبه ... يغلط على المراجعين ويسفل فيهم ( اغلبهم مندوبين ) .

الصراحة .. الشرهة مو على الجلب الي قاعد ينبح .. الشرهة على هالي حاطله لحية ولاهو خايف ربه

من الفعايل السودة الي قاعد يقوم فيها الموظف الحقير الي عنده.

تغافلت البوليسي ودخلت المكتب وقعدت على احد الكراسي ..

قلت في قلبي .. مايقومني من هالكرسي الا ملك الموت .

وتمنيت وقتها ان هالكلب عزكم الله .. يغلط علي !!

لحسن الحظ .. ما جرب صوبي ..

وقدرت امشي معاملتي بفضل من الله بدون نجرة .

------------------------------------------------------------------------------------

مستشار .. فهمان

في احد اجماعاتي في مكاتب احدى الشركات

بدأ أحد المستشارين بالحديث عن مخططات المشروع .. واستمر في الحديث لمدة طويلة دون مقاطعة من احد ..

على الرغم من الاخطاء الفنية والمعلومات المغلوطة .. محد فكر يصحح معلوماته لكبر سنه وخبرته الكبيرة

بعد الانتهاء من حديثه .. صار دوري اتكلم عن الجزئية الي تخصني في المشروع .. ومن أول جملة .. الحبيب نزل لي سلايت

لاااااءااا .. ميصحش كدا .. انزين خلني اكمل .. كلمت جملتي الثانية .. ويرد الحبيب بسلايت ثانية ..

المشكلة ان معارضته في غير محلها .. وكلامي كان صحيح باجماع الحاضرين

وتكررته مقاطعته .. وتحولت الي اسلوب غير محترم .

عقبها صارت الدنية شرار .. ما اذكر شنو قلت من قوة انفعالي...

عرفت أول ما ركبت السيارة من المهندس الي معاي .. يقولي اهو غشيان من الضحك

(( أول مرة أشوف مقاول يزف استشاري ))

الحلو في الموضوع .. ان كل الي نبيه صار .

والاستشاري كان وضعه ... لا تعليق

أهو الي ياب الحجي حق عمره ..

------------------------------------------------------------------------------------------

اتصال .. ناري

لا يخلو هالموقف من الطرافة .. على الرغم انه مثير للاعصاب

يومها كانت توني داش المكتب عقب مشوار طويل تحت لواهيب الحر .

طلبت من محبوب اييبلي 4 بطول ماي ابراج .. وقبل لا توصل بطول الماي

رن تيلفون المكتب ..

قال :ألو ..... قلت :ألو

قالي : انتو متأخرين علينا كتير ... لي محدش قانا المصنع لاعتماد التصميم

(( وقتها فعلا كنت متفق مع مصنع ثاني اني امرهم .. بس بناء على اتصال منهم ))

قلت له : عفوا من معاي .. قال: مهندس × مدير المصنع

قلتله : عفوا .. أنا متفق مع المهندس ÷ انه يتصل اذا جهزت العينة

أهني الحبيب فصل .. وقال ( بصراخ ) : لاااااءااااااا مش كدا .. انتو مأخرينا

وحتتحملو غرامة التأخير .. ووو ... ووو ...

وانة احاول أهديه : بس عفوا .. العفوا ... بس اخوي

فجأة .. حسيت اني صج قاعد اتهزأ منه

جان تتحول المعركة .. الي صراخ وشرار يطشر من الصوبين

الي ان .. عرفنا آخر شي الى الموضوع فيه .. سوء فهم .

---------------------------------------------------------------------------------------

الخلاصة

أكيد مرت عليكم مواقف اقوى من جذي .. واحترقت اعصابكم

صدقوني ماكو شي يسوى بهالدنيا العصبية وحرق الاعصاب

Be COOL