حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers



1955


رحمه مستغرقة في دق الهريس مردده أهازيج من نوع "يا الله و يا الله ...يا الله و يا الله

يا الله و يالله ...يا كريم يا هو "

الولد يقطع عليها أهزوجتها : رحمه... رحمه ..شفتي امي

رحمه : لأ ما شفتها

الولد و بأعلى صوت : يما يما ...يمااااااا

اليده : و صمه...شهالصيحه ...امك شالت شلايلها و طلعت بيت ابوها ..بنت ابليس

الولد : يعني انتي امي الحين ؟

اليده : أي انا امك

الولد : يما بروح الحبال مع صلوح و سلوم

اليده : يصير خير

الولد : اقولج بروح تقولين يصير خير


1965


الام مستلقيه على " الدوشق" بالصاله و مبروكه " العراقيه " تدهن و تهمز ريولها

الولد : يما يما ..يماااااا

الام : لا تلبح وايد ...شعندك قول

الولد : يما خلروح لبنان ..حمود يقول لبنان احلى من مصر

الام : يصير خير

الولد : يعني ما راح نروح لبنان

الام : قتلك يصير خير ..اذلف عن ويهي

1975

الام مندمجه بمشاهدة زيارة السادات بتلفزيون الكويت

الولد : يما يما ....يمااااااا

الام : اجعم جعمك الله

الولد : يما ميخالف اروح الحداق مع نواف بعد المغرب

الام : نوافوا ما غيره ...لأ طبعا

الولد : ليييش ...الكل بيروح معاه ..حمود و خلود..يماااا

الام : انزين يصير خير

الولد : يما لا تقولين يصير خير ...قولي انزين


1985

الام في حالة انشكاح ...حاطه جهاز البخار على راسها ..و قاعد تقرا مجلة سيدتي

الولد : يما ..يما ..يماااا

الام : الله يقطع ابليسك ..شتبي

الولد : يما عطيني ربع دينار ..يروح السينما مع رائد

الام : يصير خير

الولد : يبا ..يبا ...يباااا


1995

الام توها خالصه من صلاتها ..قاعد تفصخ ثوب الصلاة

الولد : يما ..يما ..يماااااا

الام : يعلك الغافيه اللي تعافيك

الولد : يما نقي فلوسج ..يلا بسرعه

الام : ليش

الولد : بروح الصالحيه

الام : يصير خير

الولد : يعني حامض على بوزي

2010

الولد منبطح بالصاله يطالع مباراة المانيا و اسبانيا

الام : عبداللطيف ..لطيف

الولد : هلا يما

الام : حبيبي ابيك تودي خواتك السبت الياي دبي

الولد : ما عندي رصيد اجازات

الام : من قال لازم تاخذ اجازه ..بتروحون الصبح و تردون بالليل

الولد : يصير خير


17 التعليقات:

سلة ميوّة يقول...

مسا الورد

امممم

انت تقرا افكاري!!!

امس انا وبقشة نقاشنا نص ساعه على


يصير خير!!!



:)


يصير خير

BookMark يقول...

حتى الـ "يصير خير" تغيرت وتحورت خلال هذه العقود

وعلى (لاتقولين يصير خير قولي انزين)
أذكر كنا نقولهم لاتقولون ان شالله قولوا انزين :)
كنا نبي كل شي مضمون 100% ومو متعلق لا بظرف ولا مشيئة، استغفر الله :)

le Koweit يقول...

لووووول
اذكر قبل لما كنت اطلب من ابوي شغلة
ويقولي يصير خير
اغسل ايدي
جنه قايلي اذلف بس بطريقة محترمة
لووووووووول
:)

عين بغزي يقول...

أنزين

يصير خير :)

ميمة السبيت يقول...

** احسن طريقة للتصريف و تسكير المواضيع

الجودي يقول...

سامي

إلي شدني في موضوعك أكثر من يصير خير و إنزين

تسلسل الطلبات وفق الزمن و وضع الأم من دق الهريس لي الدوشق لو زيارة السادات لي البخار ومجلة سيدتي و الصلاة تطور كويتي بحت أحس مر معاها شريط ذكريات من نوع خاص مر في كل هالمراحل باستثناء أول عشرين سنة ولا أقولك خلهم 30 سنة P;

esTeKaNa يقول...

أنا مثل الجودي
عجبني الحوار...والمشاهد المختلفه باختلاف الزمن
بصراحة:
رائع
:)
اما يصير خير:
فهي السبيل السريع للخلاص من حنة رنانه على الراس
:)

البشـاير يقول...

:) "يصير خير" هي الوجه اللطيف لكلمة *لا .
لطالما آرقتني هذه الكلمه في صغري ..

----------------------

آخر سطر:
وقفت كثيرا أمام يصير خير2010
لا أعلم هل كانت وقفة تأمل أم تحسـر ;)

q8-lawyer يقول...

عجبني تسلل الأحداث
وشلون تغير أسلوب الأم وطلبات الولد ؛)

إذا كنت أبي شغله ومصره عليها
ماأحب يصير خير أحب إي أو لأ

وزيد على تغير الطلبات عبر السنوات

طفل عمره 7سنوات يحن ويبي آي باد وبلاك بيري
عيل إذا صار عمره 10 سنين توقع شراح يطلب!!

الله يستر من السنين اليايه

ٵنثے ملآئكيـﮧ ~ يقول...

لووول الزمن دوآر ، يالله سترك
" يصير خير " ،

nextwensday يقول...

يصير خير = غسلوا ايدكم = من امه لا

chandal/danchal!! يقول...

بسنة 95 ما كان في لا فنار ولا حتى سوق شرق

:)

خوش بوست كالعادة

عيالي يطفرون مني اذا قلت ان شاءالله!

Sami يقول...

سلة ميوه ....توارد خواطر :)

بوك مارك... اشاءالله يعني بالنسبه لنا بالمشمش :)

لو كويت ...اخترت الصوره الاولى و الثانيه ..ماشاءالله خوش صور ..الله يعطيك العافيه :)

عين بغزي ...يصير خير مالتك تهديد :)

ميمة السبت ...بالضبط :)

الجودي ..اخر كلام ثلاثين سنه :) ... الله يستر من مستقبل يصير خير :)

استكانه ... " يصير خير " و بالمشمش وجهين لعمله واحده :) .. شوعنا معنى " يصير خير "

البشاير ...اعجبتني مدونتج :)

لوير ...مو هذا الي انا خايف منه :)

ٵنثے ملآئكيـﮧ ~ ..شفتي شلون :)

nextwensday ... لووول

جندله ... صج والله :) ..ويه الكويت توها مطوره ..غيرتها خليتها الصالحيه :)

Rawan يقول...

LOOL !
"يصير خير" ، طريقة للتصريفة من قبل الوالد
مُستنزفة بـ كثرة
p;

TaZmaNiA يقول...

خووش بوست صج يوصف حال الازمان :)

Yousefiya يقول...

إي والله إن الزمن تغير :)
يعطيك العافيه :*

Sami يقول...

Rawan....الله يحفظها لج :)

TaZmaNiA... شكرا جزيلا :)

Yousefiya..الله يعافيك :)