سوالف يال

من عشر سنوات تقريبا ، او أكثر قليلا ، سمعت عن موقع اسمه واحة.نت . يقدم خدمة طلب مطاعم الفاست فود عن طريق الانترنت .

أتذكر ان كان فيه مطعم او مطعمين اقدر اطلب منهم ، يومها جربت اطلب من احد مطاعم البيتزا الشهيرة عن طريق هالموقع . ولا وصلني الطلب ، فغسلت ايدي منه ، وقلت في قلبي مايشوفون شر ، وعلى ما أظن الموقع اختفى من الساحة .

عقبها بجم سنة ، شفت اعلان في احدى المواقع عن موقع توصيل مطاعم اسمه طلبات دوت كوم . قلت بقلبي ، ما راح يكون افضل من الي قبله .. الناس وين واهما وين . الواحد يشيل السماعة ويتصل على المطعم اسرع له .

مرت الايام ، وجربت مرة اطلب من خلاله . بصراحة كان الفرق كبير بينه وبين الواحة . توصيل سريع ، خدمة اون لاين شات .. يعني اذا عندك مشكلة موظف الدعم الفني يرد عليك بسرعة . وكل يوم عن يوم ، يزيد عدد المطاعم الي في قائمتهم ويتضاعف .

اليوم موقع طلبات أصبح من أنجح مشاريع التجارة الالكترونية في الكويت. في اليوم الواحد يستقبل طلبات من اكثر من 600 عميل ومرات يوصل اكثر هالرقم . الي يميز طلبات انك تدش وتطلب من المينيو على راحتك وانت واثق ان جميع ملاحظاتك الدقيقة وصلت بشكل كامل .

الله يبارك لصاحب الموقع .. واقوله كفو والله .. انتمانك التوفيق دائما . وانشاء الله نشوف مشاريع الكترونية جديدة من شباب الكويت .