حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك


عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


يقول عن حكومتنا انها حكومه تعذب و تهين المواطنين ..نسى قبل شوي ماحط سايقهم طراق و كاسر خشمه ..بس لانه دعم بسيارتهم دعمه خفيفه

ماسكه موبايلها تحش و تحلطم على حكومتنا ..توقف السياره ..تنزل الجامه .. تقل زبالة السياره .. ترفع الجامه .. و تكمل طريجها ..و تكمل تحلطمها


نييب طاري النواب .."هذا ماخذ باناميرا و هذا معطينا مزرعه و هاذي موظفين زوجها" ... في جلسه حلوه تجمعنا في خوش مطعم بوقت دوامنا الحكومي

نستذبح علشان ناخذ اجازه طبيه ..علشان نغسل جبودنا بسفره او كشته ... مع هذا نظل نستنكر جذبات وزارة الداخليه

يطب بادارة حكومتنا .. و يقعد يتذاكى و يتفذلك ..و على مكتبه معامله صارلها شهر تحتاج توقيعه

13 التعليقات:

الزين يقول...

يتكلم عن الفساد والتسيب بالإدارات الحكومية واهو ما يدل مكتبه هذا اذا اصلا عنده مكتب

يتكلم عن التضخم الإقتصادي
ويبي يسأل وين راحت فلوس التنمية
ويفرح بالألف عشان يسافر

يسب ويتف بالداخلية وفسادها
واول واحد يدور له واسطه عشان يطيح مخالفات السرعه عنه



عندي سؤال بسيط يمكن الكثير بيمسكه علي ويمكن ارجم بعدها

لو كان محمد غزاي مو مطيري
بتصير هالفزعه كلها

انا ما اقلل من فداحة الفعل ولا عمق القضيه
انا اتساءل لو كان المواطن شخص عادي وماوراه قبيله ولا عشيره تفزع له
بيصير هذا كله
اكو احد بيطالب بحقه
ولو طالبوا بحقه بيكون لهم هالثقل السياسي كله

قبل محمد غزاي كان في حالات تعدي وضرب وتعذيب كثيره
ليش محد ذكرها
عشان محمد توفى الله يرحمه
نعم اوافقك
بس هل هذا يقلل من حجم الفعل وفداحته بالنسبه للآخرين
ولا يعني لازم الناس تموت عشان ننتبه
ولازم يكون وراهم ثقل عشائري او سياسي يضغط على الحكومه عشان تعترف بغلطها وياخذ الميت او اهله حقه

ارد واقول انا مو ضد المطران ولا ضد القضيه

انا قاعدة اتكلم عن واقع احنا عايشينه

...

ورجاءا اللي وده يعقب على كلامي
لا ينفعل بليز

ويرد على بحدود لغة الحوار


..

شكرا لك يا سامي لسعة صدرك

الجودي يقول...

و إلي ما يطق الخدم

و يحافظ على النظافة و الماي فوق البيعة

و إلي يستغل ساعات العمل للعمل فقط

و ما ياخذ إجازات مرضيه إلا في حالة المرض

ولا عنده معامله تقعد على مكتبه و لا بريد يتعطل

اتوقع من حقه يتحلطم على الحكومة

ترى في ناس جذي مو الكل مثل ما وصفة

:)

Mohammad Al-Yousifi يقول...

دبل ستاندارد

Amwaj يقول...

السلام عليكم
يعطيك العافية أخوي سامي على هالبوست

آنا أشوف إن الكويت والحكومة ما قصروا بشي معانا من صغرنا
يكفي إنها وفرت لنا التعليم والعلاج وأشياء ثانية من غير ما تاخذ ضرايب مثل الدول الثانية

هذا يزاها الحين ؟!!
تحلطم وسب وإثارة فتن وتشويه صورة الكويت جدام اللي يسوا واللي ما يسوى
ليش كل هذا !!

أما بالنسبة لسؤال الزين فما أعتقد هالبلبلة عشان محمد غزاي ( مطيري )
بس يمكن لأنه مات من الضرب والتعذيب
والضرب والتعذيب سياسة المباحث بس ما أعتقد وصلت هذي السياسة في يوم من الأيام لقتل مواطن كويتي

وسوري ع الإطالة

غير معرف يقول...

يعني بالنهاية كلنا سيئين

و حلال على الحكومة تلفق لنا تهم و تعذبنا و تذبحنا و تشوه سمعتنا بعد الموت ..

يا عزيزي ..

اللي يطق السايق المفروض يسجلون بحقه قضية ضرب
و اللي تقط الزبالة المفروض يسجلون عليها مخالفة و الموظف اللي ما يشتغل المفروض يخصمون عليه .. و الحكومة اللي تذبح الناس الأبرياء و تشوه سمعتهم المفروض ترحل .

كلها أشياء مفروض تسويها الحكومة و ما سوت شيء منها ..

تدري ليش ؟

لأن فيه ناس مثلك يبررون لها أخطاءها و حتى جرايمها .

ينكرون بالبداية خمالها و إذا أنصادوا قالوا الحكومة سيئة لكن معارضينها أسوء منها و إذا كلش كلش انحشروا بالزاوية .. قالوا عادي مو بس الحكومة خاملة .. الكل خامل .

أنت و ربعك سبب تخلف الشرق الأوسط :)

سلة ميوّة يقول...

ليش عيل المنافقين في الدرك الأسفل من النار؟؟


لأن للنفاق أنواع



الله ياجرنا بس...ويفك عوقنا..هذا اللي اقوله...
على هامش الهامش:

وسامي جيك على ايميلك لاهنت..ترا دزيت رد سؤالك في البوست الأخير على الايميل:)


مودتي

I7na 3shagnaha يقول...

9a7 lsanik

زخ ـة .. مـًُـطر .. يقول...

حبيت أرد على الزين وأتمنى اوضحلها شي يمكن ما كانت منتبهتله

هذي مو أول قضيه تقوم على وزارة الداخليه والدليل قبل قضية وفاة محمد وجه نائب من نواب مطير سؤال بخصوص الحدث السعودي .. ولكن الشعب اهو اللي انتفض هالمرة وليس بسبب قبلي أو طائفي كما قلتي .. ولكن بسبب وطني .. وانساني أولاً وأخيرًا

وأعتقد إنا رغم هذا كله نعتبر أحسن شعب بالعالم وما نستاهل الطق هههه

تحياتي للجميع

الزين يقول...

زخة مطر

اول شي شكرا لرقيك بالرد
واحب أأكد لج ان قضية الحدث السعودي كنت متابعتها وبألم شديد للي حصل واللي ينافي كل ما ترمز له الإنسانيه والأخلاق والدين

واسمحي لي اصلح لج
ماهي انتفاضه شعب كثر ماهي فزعة وانا مو ضدها كلش
ولا ضد نواب مطير او غيرهم
انا قاعدة اتكلم من مبدأ ليش في قضايا تثار في اوقات معينه ويصير عليها تركيز اعلامي كبير
وليش في قضاها تهمل والتركيز عليها يكون على قد الواجب وبس
واحنا سوينا اللي علينا!!

تعتقدين قضية الحدث السعودي ما كانت بنفس اهمية قضية المرحوم باذن الله محمد
لما طفل في بداية حياته يتعرض لإنتهاك لعرضه وانسانيته هذي مو قضيه تستحق الإنتفاضه الشعبيه على قولتج
!!

استخدام بعض النواب لقضايا تستحق الإهتمام في جميع الأحوال والأوقات وتركيزهم عليها في وقت معين كمكسب سياسي هذا اللي اقصده
وظفوا قضية محمد بصالحم وكل واحد عامل نفسه صالاح الأيوبي ومنقذ الأمه

وينكم من قبل
الحين قمتوا تكشفون عن فساد الداخلية
ليش من قبل تغاضيتوا
وليش الحين لما قلبتوا على الوزير نتيجة للي صار بديوان الحربش بلشتوا تكشفون الخراب

قولي لي
لو كانوا نفس النواب يعيشون شهر عسل مع الحكومه ومع الوزير نفسه ورئيس مجلس الوزراء
تهقين بندري عن محمد وغيره ممكن انتهكت حقوقهم كمواطنين!!

محنا احسن شعب
محد خيرنا على احد
احنا متعادلين ومتساوين مع غيرنا فيما يختص بالحقوق والواجبات
ورغم هذا احنا ما نركز الا على الحقوق
هذي هي المواطنه الكويتيه عند الأغلبيه
الا ما رحم الله

وصدقيني محد يستاهل الطق
حتى الهندي اللي بالشارع يخم جبال بيتكم

عندنا نتحدث على مستوى انساني ارفع من تصنيف الناس ووضعهم تحت مسميات معينه

صح!!

شكرا لم يا سامي

Seldompen يقول...

وتستمر الحكـاية !

ولا أعتقد بأننا نستطيع أن نصل إلى نهاية مرضية أبداً ..


تحياتي لك ..

غير معرف يقول...

خوش بوست ...يبرد الجبد بصراحة.....صح لسانك

Engineer A يقول...

كفيتوا ووفيتوا ويعطيك العافية :)

خاتون يقول...

السلام عليكم...

That's right

اللي يبي يصلح يبدأ بنفسه
وكما تكونوا يولى عليكم

ما يصير نرضى بالغلط لكن لازم
نفكر قبل ما نتخذ قرار

لازم الكويتين يحاسبون أنفسهم بعد
لأنه أحنا دمرنا بلدنا بايدنا للأسف


تشكر على الفكر المتعقل