حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك


عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers

اصدقكم القول ..انا يمكن من النوع الي يجامل ..و اغلب الاوقات اجامل على حساب نفسي ..بس ما قط مره نافقت مديري او اي مسؤول ..لكن هذا ما يمنع ان انتعرف على سمات المنافقين و شخصياتهم المثيره للغثيان .. يمكن في المستقبل تحدنا الظروف ..و نضطر ان نستعمل بعض تكتيكاتهم الناجحه في اغلب الاحيان .

كيف تنافق مديرك ؟ الجواب كالتالي

- انت بطريجك للدوام ..مريت ستار بكس ..ما يمنع تطلب اثنين " فاربتشينو " لك و لمديرك , تحطه على مكتبه قبل لا يوصل .

- تقريبا على الساعه 9 ...حط البخوره على الفحمه.. و بسرعه توجه لمكتب المدير ..طق الباب و افتح قبل لا يسمحلك ..لا تعطيه فرصه يسألك شقاعد تسوي او يشكرك ..بخر بسرعه و اطلع ..لا تنسى تحافظ على بقايا البخوره "لتبخير" مكتبك .. جذي تكون طيحت ثلاث عصافير بحجر ..بخرت الممر و مكتب المدير و مكتبك .

- اذا شفت مديرك ماد البوز ..لا تزعجه باوارق لازم تتوقع منه ..او دفعات ماليه تتطلب اعتماده ..اخرها جم يوم ..ماراح تنقلب الدنيا .

- لازم تمدح ذوق مديرك ..تمدح بدلته او لون كرفتته اذا اهو راعي بدلات ..لكن اذا اهو راعي دشاديش ..امدح ساعته او وانتوا بكرامه جوتيه .

- اسأل مديرك عن عمره ..بمجرد ما تسمع الرقم ..اشهق و بحلق ..و بصرخه اندهاش ..عبر عن رأيك في ان مظهره اصغر بكثير من عمره الحقيقي و اختمها .. بحوقلة ماشاء الله ..عيني عليك بارده .

- ما ان يبدأ مديرك بالتدخين ..عبر عن استيائك و حرصك على صحته .

- اذا شفت مديرك مرهق و بدا يتمقط ..بادر " بتهميزه" ... و راح تكون لفته حلوه منك اذا غنيتله اغنيه رومانسيه تساعده على اراحة أعصابه ...صدقني ما راح تقلل من قيمتك .

- لا تجادل مديرك ..اثني على قراراته و توصياته ..كله طلعه بالزينه ..بالنهايه اهو المدير و اهو الي راح يتحمل مسئوولية قراراته .

- وقت طلعتك من الدوام مع طلعت مديرك ..لزم انك تشيل جنطته و بطريجك معاه للسياره ..سولف معاه بمواضيع بره الشغل .

- لا تتحرك لين ايدق سيارته سلف و يمشي .

تحذير :

اذا طبقت الخطوات المذكوره اعلاه راح تربح دنيتك الفانيه و تخسر اخرتك الباقيه .


15 التعليقات:

why me يقول...

ummmm


بس اكو طرق ما ودي أسويها :)


بس خوش طريقه

عاد انت شنو اللي قاعد إطبقة بالضبط؟

;p

esTeKaNa يقول...

اشيل جنطته؟
مادري ليش تذكرت شيله جنطه الابله والبنات المتلمقات المنافقات
سبحان الله ترا هالدرب يبيله ممارسه من الصغر
:P
خوش بوست
صبحك الله بالخير بعيد عن اي نفاق
:)

BookMark يقول...

لالا مااتخيل اهمز ظهر مديرتي لا واغنيلها بعد ياسلااام D:

الوحده الوطنيــــه يقول...

السمي في خطوات تختصر الطريج هذا كله .
كل ويك اند الموظف المنافق يمر سوق السمج
يشتري جم بالول و شوية شعيمات و يمر
و سوق الخضره عالطريج يشتري له جم شدة
رويد على بربير على بصل اخضر و يروح بيت
المدير يطق الباب و يطلع له راجو و يقول حق
راجو هالغريضات حق عمتي ( زوجة المدير )
و العمه تطل من الدريشه و تقول حق راجو ليش
مخليه واقف بدون ماي .. راجو يعطيه قلاص
ماي من النل و يشربه الموظف المنافق و يتوكل :))))

الوحده الوطنيــــه يقول...

مو احسن له من انه يشوفونه بالدوام
و يقولون عنه منافق ؟؟
جذي يستر على روحه لووول

chandal/danchal!! يقول...

هذا منافق هارد وركر

في ناس مالها بالطويلة... بطلعة "حداق عمل" مع الوكيل, الادارة تصير بالمخبة

الله يكافينا الشر
:p

le Koweit يقول...

شغل تقلقس صح D:

غير معرف يقول...

مستحيييييييييييييييييييييل أنافق

أحلى شي بالبوست التحذير؛)

صبا يقول...

شوه ... اخوي مديري ... اقلقس عنده بالبيت
:)
؛)

Sami يقول...

واي مي ... تبين الصراحه هالخطوات ما تليق بالبنات .. الانثى اصدق من انها تنجر لهالممارسات :))

استكانه .. معلومه يديده ..انتي فاهمتني عدل و ماشيه معاي على الخط :)) الموضوع كله من باب الغشمره و الفكاهه .

بوك مارك ..ليييش ما تبين بونص :))

عاضه ..لوول الصراحه بدعت ..اعلاه من الي كاتبه .

جندله ..لوول ..لأ انتي قاعده تتكلمين عن مستوى رئيس مجلس الاداره ..هذا التكتيك مفيد لمدير الشركه ..واضح ان عندج خبره لا يستهان بها :))

حقوقي ..لوول اعجبتني كلمة "تقلقس" ما ادري ليش ما طرا على بالي اكتبها فوق .

لوير .. مثل تحذير الزقاير :))

صبا ..اذا اخوج متزوج ..تقلقسي عند زوجته :))

ARTFUL يقول...

انزين خل اقولك شنسوي بمديرنا

كل نييب طاري العمر انا اتعند اعطيه فوق الخمسين وهو اول الاربعين

كل ما يقط غترته اقوله ليش ما نروح حق الدكتور يعالج صلعتك حرام تخرعنا

وانت رايح وكل شهر يقولي احسب حسابك هالشهر ماكو معاش!!

p;

فاطمــه يقول...

]-->اذا شفت مديرك ماد البوز ..لا تزعجه باوارق لازم تتوقع منه ..او دفعات ماليه تتطلب اعتماده ..اخرها جم يوم ..ماراح تنقلب الدنيا .

لووول هذي أكثر وحده ضحكتني
عاد صج
لأنه اذا مبوز ومعصب بيحط حرته فيني
لووول

تحياتي

msha3erha يقول...

يا معود زين ضفت التحذير ;) انا اقرا و اقول لا حشا هذا مب سامي الي اعرف مدونته قبل .. لا و يبينا ننافق بعد لووووووول لين قريت اخر جملة ضحكت

يعطيك العافية ياخوي =)

سلة ميوّة يقول...

هاههاهاهي ضحكتني...



عاد تدري...النفاق..والبخل..

صفتين قاتلتين...


مسّاك الله بالخير

Sami يقول...

ارتفل ... الله يعينيك ...مستقبلك في خطر :))

فيونا ... هذي بالذات اعرف ناس يسوونها ..ايعطلون دفعات علشان خاطر "مود" المدير :))

مشاعرها ... اهم شي التحذير :))

سلة ميوه ... اهلين و سهلين و مرحبتين :))