حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


صبحكم الله بالخير

ودي اتفلسف على روسكم من صباح الله خير

ما هي العوامل التي تقوي علاقتكم بأي شخص ؟

اعيد صياغة السؤال

شنو الي يربطكم بالاشخاص ؟

هل هي

رابطة الدم

او

رابطة الدين

او

رابطة اللغه

او

رابطة العشره

اعطيكم مثال علشان اسهلها عليكم

ابدي مع الهوانم

نفترض ان بنت عمج زارتج البيت ...و هذي بنت عمج ما تشوفينها الا بسنه حسنه... و انتي قاعده معاها ماخذتكم السوالف ..يت الخدامه بتقدم العصير ..تعرجبت و كتت العصير على بنت عمج...و تعالي يا بنت عمج و روحي و زفي و سبي الخدامه ...الخدامه تعصب و تقعد تراددها ..و يصير ملاسن بين الخدامه و بنت عمج ...تفاككينهم و تنفض الهوشه ...و فجأه تقولج بنت عمج يا انا يا اهي في البيت ..اذا ما سفرتيها بقطع علاقتي فيج .

شنو راح يكون موقفج ؟

ترضخين حق بنت عمج الي يربطج معاها النسب و الدين ..و تسفرين الخدامه

او

ترفضين طلبها و توقفين مع الخدامه الي تربطج معاها رابطة العشره ...عشرين سنه في بيتج ..شهدت معاكم الافراح و الاتراح و كانت بقربكم وقت الصحه و المرض

نفس السؤال للبشوات

قاعد بالدوانيه مع ولد خالك ..يه الصبي و كت الجاي ..وصار نفس الموقف الي فوق

شنو قرارك؟

بالنسبه لي رابطة العشره اهي الاولى

18 التعليقات:

chandal/danchal!! يقول...

صباح الخير
:)

اسافر انا واخلي القرعة ترعى

خااالف تعرف يقول...

صبحك الله بالنور العزيز سامي

بالنسبة للبوست

انا مع صاحب الحق اياً كان

------
اما الفرضية اتوقع ما تصير في المجتمع الذكوري لانه
من العيب انك تذم او اطق صبي او خادم الاوادم حتى لو غلطان
( نوع من الاتكيت والمجاملة ) بس تطمن معازيبه بيعطونه حقه !!

اما عند الحريم عادي ؛)


طاب يومك ايها العزيز

الجودي يقول...

صباح الخير

تبي الصج و نظرا لسوق العمالة الحالي و ندرة وجود السنع و كون الخادمه على قولتك عشرة يعني أكيد بنت عمي اتعرفها و بصراحه الحركة مافيها ذوق تحط دوبها دوب هالخدامه إن صار بقولها على خير ومو صاير خاطرج إلا طيب و أنا أورايج فيها بالي يسرج و بصراحه ماراح اسوي شي يعني هذه من الحوادث إلي مو مقصوده وممكن تصير عادي و أنا ضد التعامل مع الخدم بتعسف يعني مثل ما هي تشتغل احنا نشتغل و أكيد ما نرضى مسؤولنا يقلل من قدرنا في التعامل ...

و لي زارتني مره ثانيه بقول للخدامه لا تقبلين علينا و لا تشوفج و بس فك الفك ...

BookMark يقول...

اليوم الصبح وحدة اسألتني:
عمرج رافجتي وحدة مو كويتية؟
قتلها لأ!
قالت ليش؟
الجواب ... مادري !
يمكن لأن ماصارتلي فرصة صداقة،
يعني مايمنع إني أصادق إذا صارت فرصة،

مانقدر نحدد رابطة معينة لعلاقتنا مع البشر
:)

Basees يقول...

صباح الخير عزيزي سامي

علاقة الدم دائماً تغلب على أي إرتباط آخر، والموقف اللي ذكرته صعب البت فيه. ولكن شعوري أن الشخص الذي يطلب مني تسفير إنسان قد يترتب على قرار ترحيله شقاء مادي عليه وعلى أهله لالسبب سوى أنه تعثر وسكب شاي، لايستحق أن أبني علاقة وطيدة معاه حتى لو كان قريب لي.

تحياتي

panadool يقول...

الزميل العزيز سامي
بما إن اليوم يصادف مرور عام على إنشاء مدونتك الغراء
يعني عيدميلاد اليال
أهنيك على تدويناتك وأدعوا لك بمزيدا من التقدم

كثيره المشتركات بيني وبينك ولعل إحداها هي إنطلاق مدونتى ومدونتك فى نفس الشهر ولذلك لاأنسي تاريخ مدونتك


سلامي الحار الى زميلك رامي اللى يادوب يبين

تمنياتى لك بعام تدويني جديد وبتميز

تحياتى الحارة

Engineer A يقول...

انا عن نفسي اهدي قريبتي البعيدة واجبر بخاطرها وبنفس الوقت اواسي خدامتي :)

عبدالله يقول...

صباح الورد

بهدي الموضوع وبقول له ولايهمك بسفره وبخليه لين ولد عمي ينسى السالفة .. ههههههههههه

الا اذا كان قلبه اسود وماينسى هذي مشكلة

daggero يقول...

أول تعليق

العزيز سوالف موضوعك فى الصميم وفى موقع الأحداث

بالنسبة للحوادث الأفتراضية فى الحالة النسائية بكل بساطة المضيفة تقول حق المدعوة " أشدعوة ياحافظ ماصار شي هاو ماشفتي حملة حطي نفسج أبجوتيها"

وأحتمال كبير أذا الخادمةممتازة وتسفرت يمكن بنت العم اللي أنكت العصير عليها تروح مكتب الخدم وترجع الخدامة القديمة مع أبتسامة بايخة وجملة والله يابنت عمي لاتواخذينا جبنا خدامتج القديمة لأنها كسرت خاطري

أما بالنسبة للرجال فأكيد الصبي راح ياكل له طراق وبعدين يراضونه بجم دينار يروح فيهم مرقاب وماليه

ناعمة الهمس يقول...

اهم رابط عندي هو التفاهم و التوافق النفسي و الاشتراك بنفس الميول
و الاهداف
ممكن ان تكون لي علاقات مع وايد ناس بمجرد ان ارتحت لهم
وممكن ان في ناس عايشين معاي سنين بس ما احس اني انسجم معاهم
هذا هو المهم في رابطة علاقاتي مع الكل
بالنسبة للسؤال

طبعا من الظلم ان اطرد خدامتي عشان بنت عمي
لو امي اي ممكن
لكن بنت عمي اقدر اماشيها بالبداية
و بعدين افهمها ان لو انتي بمكانها راح تحسين بالظلم و ان راح اقطع رزقج

امبيه جني قرررقت
ياحلات و انا اهمس بس

سلة ميوّة يقول...

:)

انت من صجك؟؟؟

اصلا من انكب عليها العصير
انا بقوم واخذ الصنيه وارقعها على راس بنت عمي ان بطلت حلجها..
الحين انتي ماتين الا بالسنة حسنه..
وبعد لج عين اتناشبين اهل البيت والله حاله

ههههه ويمكن يمكن اذا اسعفتني سرعة البديه
ابطل الكام
واصورها لايف وواحطها عالى اليوتيوب

هههههه
مادري شفيني شريره هاليومين


اول شي احم احم صباح الخير..

ثاني شي خلاص خلنا نتكلم جد:)

امم اعتقد بهالموقف ماراح انطر يتمادى الإصراخ ...

اول شي بسويه بتعذر من ضيفتي وبصرف الخادمه بأدب...
الحوادث اتصير
واهي بني ادام مهي معصومة من الخطا

وبقلب الموضوع فكاهي وبكسب الوقت بتنظيف ملابسها بالقعده والسوالف..باخذه من هالباب...

إذا اهيا شرانيه...و في راسها هوشة...
بخليها اطلع حرتها بالحجي بالخادمة..وبأشر حق خدامتي تسكت...بعد ضيفتي ماينفع تنهان في بيتي ..لو شنو..وتالي لما تطلع باخذ بخاطر الخادمة...

عاد الحين انيي حق السناريو الي انت قلته...

اهيا اتصرخ والخادمة اتصرخ
وطلع الموضوع من سيطرتي وانقالت الجمله
يا انا يا اهيا بالبيت...
بقولها لج الحشيمة واكيد انتي...

وعلى ما تيني السنة الياية والا بأي مناسبة ثانيه
بخش خدامتي وبقولها لاتطلعين حق هالنسرة:)


بس تبي الصج ماعتقد هالشي يصير...

يعني ياما اروح بيت ناس
وعيالهم والا خدامتهم اتكب على ملابسي والا جنطتي...
الموقف بروحه محرج حق صاحبةا لبيت...بعد ازيد الطين بلّة واهستر واصرخ :):)

صباحك سُكر ونوير

على الهامش:
وارجع واقول حل اني ارقعهم الاثنين بالصينيه وارد:)

الزين يقول...

شوف
اطيب خاطرها
واحاول اراضيها
واتدارك الموقف
اما انها تقول سفري شغالتج فهذي حدودها
شؤون بيتي شي يخصني
اسفر
اطير
العن والديها كيفي عاد
ما عجبها الزيارة ام سنه تخللها او تسوي منها اجار

بس

وصباحك خير يارب

الزين يقول...

ايه ونسيت اقول اني بعين شغالتي عيان بعد ما يطلعون ضيوفي

:@

~حَدِيـثُ الفَـجْـر~ يقول...

اولا : ومن باب الاعتراف بالحق فضيله
انا فاشله بعلاقات الاجتماعيه وما يتبعا من تواصل ;qq

ثانيا : ايا انا يا اهيا ؟؟
انتي و الله معاج و الباب ياسع جمل ;qq> حق بنت العم\ه ماادري الخال\ه

مو تقديسا للعشره الي بيني و بين الخدامه
لا عشان اوري ست الحسن و الجمال ان الدلع و المصاخه و ان الي تبيه ما يمشي على كل الناس
يعني مو بكيفها ...

بس من الاساس صله الدم و القرابه اقرب شي عندي
لان الاهل اولى
الربع يروحون ويردون ويتغيرون
الاهل ضالين
وقت الصجيه مالنا الا اهلنا :))
سؤال جميل
وكلش مو تفلسف
^_^

رورو الشخبوطه يقول...

الخدامه :)

خو بنت عمي المفروض تحشم عمرها شكو تتهاوش مع خدامتي المسكينه مو قصدها ..

ومدام اهي نسره مع سلامه بنت عمي الا اذا بتيبلي غيرها وتدفع تذكرتها او اهي بتخدمني بدالها اوكي عادي :)

مركبنا يقول...

كل عام وانت بخير

مدونة ترسم الضحك وتنشر الخير (=

Sami يقول...

جندله ..احسن حل :)
خالف تعرف .. ملاحظتك في عين الاعتبار
الجودي... هذا المفروض :)
بوك مارك .. صح الكلام :)
... اغلب الاحيان تغلب .. مو دايما :)اBasees
بنادول ..تسلم يالحبيب :)
مهندسه ابرار .. تمسكين العصا من النص
عبدالله... كلكجي :)
...اهلا و سهلا :)dagger
ناعمة الهمس..اتفق معاج :)
سلة ميوه ..لوووووووووول ... حقانيه :)
الزين ... صباح النور و السرور :)
حديث الفجر ... اختلف معاج ..بس وجهة نظر احترمها :)
رورو الشخبوطه ...قرت عينج بشاي الضحى :)
مركبنا ..كلج ذوق :)

الوتيــــــــــن يقول...

بقولها :عسى الله لا يحطج بمكانها

انتي الداشة واهي الطالعه بس لو كانت ملك يميني .. العفو حلو ومالج إلا طيبة الخاطر