حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


في الزمن الغابر ..ايام الطفوله البريئه ..مرحلة الابتدائي ..اتذكر حادثه تتعلق بالقرقيعان .. تستحق انها تنذكر لكم ...بس قبل لا ادش بالسالفه ..لازم تعرفون " باك راوند الطفوله مالتي " ... كنت مقسم وقتي ما بين اولاد عمامي و اولاد خوالي ...اما صداقاتي فكانت محصوره على فئه قليله منتقاه ...كانت الوالده الله يحفظها حريصه على صداقاتي ... و علشان اخذ موافقتها لزيارة صديق ..يطلب الامر تقديم طلب باسم صديقي الروباعي و اسم امه و وين ساكن .. و شلونه بالدراسه ..يعني قصه كبيره .

المهم موهذا موضوعنا :)

يومها قررت اني اجرب اقرقع بره منطقة النزهه ...و قع اختياري على صديق ..هذا الصديق تتوافر فيه كل المواصفات لكن مشكلته انه ساكن بمشرف ..و مشرف بذاك الوقت تعتبر من المناطق الخارجيه ..حصلت موافقه بطلعت الروح ...بعد استقبال صديقي الحافل فيني ..بلشنا نقرقع ..كنت انا و صديقي و اخوه ..

مفاجأة غير ساره لي


اكتشفت ان اهالي مشرف ما يحطون خرده بالقرقيعان ...و قرقيعانهم نصه محزر ..و ثلاثة ارباعه قروضات....و يذلونك لين يبح صوتك علشان خمطة حلاو محزر ... على الرغم من المجهود الجبار الا ان حصيلتنا من القرقيعان كانت متواضعه ..قررت انا صديقي و اخوه نستسلم و نرجع لقواعدنا سالمين غانمين ...و في طريجنا لبيت صديقي ..صادفنا مجموعه مكونه من خمس شباب ..جلحان ملحان ... المشق تارسه الويه ...حتى السنسون و انتوا بكرامه متيبس خط ون وي من الخشم لطرف البرطم ... و بدون سابق انذار ..انحاش صديقي و اخوه ..و انا ما ادري وين الله قاطني ..شسالفه ليش انحاشوا ..ما ادري ..الله اعلم .

رئيس العصابه : انت .. يا الفلسطيني ..تعال

سامي : شتبي ..انا مو فلسطيني

نائب رئيس العصابه : عطني قرقيعانك

سامي : ليش ..شتبي فيه

نائب نائب رئيس العصابه : بناخذه منك

سامي : لأ ماني معطيك

حاول امين سر العصابه يسحب الجيس مني ..لكني كنت معرد معاه ..ما عطيته مجال ياخذه .. ما وعيت الا و انا مرفوع بين الايادي ...و بعد دقيقه لقيت نفسي مكود بوسط حفرة بيت توه بينبني .

رجعت البيت كلي رضوض و ايد ورا و ايد جدام ..طلعت من المولد بلا حمص

هذي اهم ذكرى قرقيعان مرت علي :)



خارج الموضوع


صورة الاسبوع من نصيب المتميزة دائما و ابدا " الجودي " و الصوره اليايه راح تكون من نصيب " سلة ميوه " للمره الثانيه ..صوره تتناسب مع الاجواء الروحانيه الي عايشينها هالايام :)

18 التعليقات:

AM.SA.CHANNEL يقول...

ذكرتني بأيام حلوووة و نحنا نسمي هاليوم " الليلة " و في بعض المناطق مثل الشارجة لين الفجيرة يسمونه " حق الليلة " ..
و نحنا الليلة تكون نص من شعبان و العصر .. حليلهم السنة إنصلخوا من الحر .. هههه السنة اليهال خقاقيين إييبوونهم بسياايير من الحر خخخخ ..

كنا نيمع الحلاوة منو يترس كيسه قبل ولا منو يلقى أكثر حلاوة، و عاده اللي يلقى أكثر ما تيه إلا المشاكل الكل يبا ياخذ من عنده ههههههه .. بس و الله أيام ..

الجودي يقول...

مساء الخير

اكتشافاتك عجيبة عن قرقيعان أهل مشرف مع إنها منطقه هاديه توقعت أهلها رايقين و قرقيعانهم رايق مثلهم لووول يعني مو محزر ؟؟؟

أما باقي الأحداث فأنا بدوري اشجبها واستنكرها لا جايده أأسف على هالذكرى الأليمه ..

- - -

كل ما احاول أتذكر القرقيعان ما اذكر إلا مجموعه بنات مستحيين لا انعرف انغني ولا نقول شي ليش نبي نقرقع ما أدري
- - -

أخ سامي مشكور على التقديم الحلو و على قبولك لصورة .. أخذتها في منطقة آخن في ألمانيا وايد شدني شكل الحريم وهم ماسكلين مظلات و مايلين على بعض جنه بينهم سالفه و صورت صورة ثانيه وأنا ماسكه مظلتي و واقفه معاهم أنا ومظلتي ما وصلنا لراس تنورتهم :\

سلة ميوّة يقول...

عورت قلبي ياسامي...

انا وايد استاء لما اعرف سوالف اليهال والظلم اللي يحوشهم من العناتر و فتوة الحارة اللي يسونه البعض واذكر مره بالمستفى ايام خفاراتي
وانا اتمشى تالي الليل بقهوتي والا اشوف واحد زارد صبي اصغر منه بتمبه كلبووس وحاكره وذاك المجني عصقوووول
:)
جان امسكه من دشداشته من ورا وارفعه لي فوق على طريقة ذا هالك:)


ذاك الكلبوس صارو عيونه قلوب حب وقوس قزح من السعاده
اني انقذته والعصقول صار جنه بريعصيه صغيرة بيدي...طبعا انا كرهت عمري حسيت انوثتي كلها بالقاع بس ماعليه نصرت المظلوم واجبه
جان اقوله

ليش حاكر الولد


جان يقولي موراضي يعطيني حلاو...

قتله شفت شمتنه؟؟؟ يالله الحلاو يكفيه وانت عصل بتموت شتبي بالحلااا و

هاااا؟؟؟ ( الها يت مع صرخة وبقت عين )
فقييير اتوقع مانام الولد...
عاد هديته والا طردي طار يركض مسكين والمتين من فرحته عطاني نص حلاوه :)
وانا ماقلت لأ
هيهيههي


مساك الله بالخير

وخوووش صورة

le Koweit يقول...

لووووول
تم مصادرة قرقيعانك :)

بس ويييه والله ياخي الكويت تكبر بسرعة
مشرف وقتها كانت منطقة خارجية

انا اتذكر مرة دكتورنا كان يسولف
يقول احنا قبل اذا بغينا نكشت (يعني نطلع البر)
نروح قرطبة :/

رورو الشخبوطه يقول...

خخخخخخخخخ ..

يالله ماعليه حسوفه مدام محزر والمهم سلامتك..

بس ويع شالمناظر قطع :\

Princess Sara يقول...

sami
أول شي هالتحقيق لازم من الأهالي قبل لا نطلع و احنا صغار :)

ثاني شي "عصابات في مشرف!"
لو تام بالنزهة أحسنلك ..
كسرت خاطري بصراحه!

le koweit
يكشتووون بقرطبه واعليا منطقتي مو لهالدرجه عاد!!!

مشكووور عالبوست :)

BookMark يقول...

الله ستر ولطف :)

ebtsamh يقول...

سؤال ثقافي شنو السنسون ؟

افا وآخرتها طلعت فلسطيني يا سامي :)

كل ذكريات وانتا منتصر :)

Shaikha يقول...

لول الحين السؤال في رئيس العصابه و نائب الرئيس ونائب نائب الرئيس و امين سر .. الخامس شنو ؟
P;

والصوره ما شاء الله "فن"!
انزين , متى دور صورتي ؟
P;

why me يقول...

لول


يا حليلك وانت صغنوون


المهم



جنك عطيتني ابو الطاف ولا حيطت ولا صوره من مدونتي؟


جني بعصب !

غير معرف يقول...

شنو يعني هالبلوق ؟؟ ودك تقول لنا انك ابيض مثلا ؟؟
نبي املق

Sami يقول...

....عاداتنا وحده :)AM.SA.CHANNEL

الجودي ..لأ الحين اهل مشرف ارتقوا شويه :)

سلة ميوه ...بالعكس زين سويتي فيه هالبريعصي ... مال تمحطينه كف ..المشكله انج ما تقدرين تقرصينه ..جلد على عظم ..شرايج فيني و انا متحامل منه جذي :) .

لو كويت ... شفت شلون :)

رورو الشخبوطه .... لوول اي والله خيره :) ...يضحكني مصطلح " قطع" بس احس ينطبق عليهم :)

Princess Sara ... اغلب عصابات مشرف تيي من صباح السالم و بيان :)

بوك مارك ...اي والله الحمدالله على كل حال :)

ebtsamh ...ما تعرفين شنو معناة " السنسون" ؟؟...ما قدر اشرح اكثر اخاف اسد نفسج عن الفطور :)

شيخه ...صورتج بالحفظ و الصون :) ..بعد سلة ميوه ..من سبق لبق :)

why me...هلا والله ..شلونج و شخبارج :) ..لازم صوره انتي مصورتها ..دزيها على ايميلي

غير معرف ...اهنيك ..تمتلك ذكاء غير عادي :)

Sami يقول...

غير معرف ..عندي رد ثاني لوسمحت ...الظاهر انك من سكان مشرف :))..كثر من تعليقاتك الظريفه

Basees يقول...

عصابة القرقيعان الحزر تكبر وتترقى إلى قرقيعان أثمن .. هاذي العادة

Sami يقول...

Basees... بالضبط :)

aL-NooR . يقول...

لووووووول
بس اشوة انه محزر لا اتحسف
p;

انا ماعندي ذكريات
اصلا مع القرقيعان
:(


و على طاري الصور شدعوة
ولا مرة انا !! :(
و ترى صورتي تواكب الاجواء :(


*******************

Sami يقول...

النور ... هلا بالنور :)) ..بالعكس انا ودي اعلق صوره من النور ....انتي ما دزيتيلي صوره !! اي صوره الي تواكب الاجواء ؟ ما شفتها ..بس الصوره الي بدزينها لي لاز انتي مصورتها

طموحة مملوحة يقول...

شيل المدونة مالتي من الي موجودين عندك ورد حطها مرة ثانية عادي وايد تصير فيني مايصير تحديث :)