حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers



بعد نصف ساعه ..و بشكل متدرج استعادت عبير وعيها ..وجدت عبير نفسها مقيده على مقعد بوسط المطبخ ..حاولت عبير فك الرباط ...لكنها فشلت في كل محاوله.. كان جل ما تفكر به هو يوسف ابنها ..لذلك حرصت عبير ان تسيطر على خوفها و لا تدع الرهبه تتملكها .. و فجـاه انفتح باب المطبخ ..دخلت فتاة فارعة الطول , ممشوقة القوام...قابلتها بابتسامه

نوره بابتسامه عريضه : دكتوره عبير...شلونج

عبير متحفزه : منو انتي ..شتبين فيني

نوره بكل برود : دكتوره ...ما عرفتيني ..امداج نسيتيني

سحبت نوره مقعد و وضعته امام عبير مباشره و جلست عليه ...تفرست عبير ملامح نوره , محاوله منها ان تتذكر هذا الوجه ذو الملامح الحاده و العيون الواسعه ....

عبير : وين يوسف ...

نوره : لا تحاتين يوسف بداره نايم ... دكتوره معقوله ليلحين ما ذكرتيني ...انا نوره ..خذيت عندج ماده قبل سنه

عبير بعد ما تمالكت نفسها : لأ ما عرفتج ...انتي ليش رابطتني جذي ...اخذي الي تبينا و طلعي

قبل ان ترد نوره على تساؤل عبير ..دخل عليهم شاب مفتول العضلات بملامح تدل على الانهاك ..هالات سوداء تحت العين و شعر منفوش

خالد : نوره انا مو قايلج لا تكلمينها .

نوره : مو شغلك ..انا بيني و بين الدكتوره حساب لازم اصفي

خالد ممسكا بورق و قلم : دكتوره ..عطيني رقم التجوري ..هذا اذا ودج تشوفين ولدج مره ثانيه .

عبير بدون تردد و لا تفكير : سجل عندك ..2005..اخذوا الي تبونا و طلعوا .

خالد : نوره تعالي معاي بسرعه

نوره : روح بروحك ..انا بقعد اسولف مع الدكتوره .

خرج خالد من الغرفه و هو في حاله من التوتر و الانفعال , بينما اتخذت نوره مقعدها مره اخرى امام عبير ..مسلطه عينيها بعيني عبير

نوره : دكتوره ما ضيفناج ..شتشربين

عبير : مابي شي ..مشكوره

نوره : لأ لأ لأ ..انتي اليوم ضيفتي ...تبين ماي بارد و لا دافي

عبير و قد انهكها الاعياء : قتلج ما بي شي ..خلاص

نوره بصوت عالي : توشاني

و في نفس لحظة نطق اسمها دخلت توشاني المطبخ ...زاد من قلق عبير عندما شاهدت توشاني و هي تبدوا على طبيعتها حامله معها تعابير وجه خاليه من الخوف و الذهول ..بدت توشاني كما ان الوضع طبيعي لا تشوبه شائبه .

نوره : مدام عبير تبي ماي





احضرت توشاني كوب من الماء ..و بكل برود سكبت الماء على وجه عبير ..و كان هذا بمثابة القشة التي قصمت ظهر البعير ..انهارت عبير باكيه و اخذت تكيل السباب و الشتائم لنوره وتوشاني ... .

نوره : توشاني طلعي بره ...دكتوره موعيب عليج تقولين هالكلام ... لا تلومينها ترا انتي سويتي نفس الشي بطباخج غلام ...بس الفرق انج كتيتي عليه شوربتج المالحه ..اما توشاني المسكينه فما رحمتيها من لسانج ..حاولت ترضيج ...لكنج عسره ماكو شي يترس عينج ...و لا جورج سايقكم هالمسكين..الي على اقل غلطه خصم من معاشه ...تعاملج مع الخدم خلاهم يسهلون علينا المهمه و يمهدون لنا الطريج ندش بيتكم .. انا ليلحين ماشفت احد احبج .

عبير بانفعال : انتي ما عندج قلب ...




نوره : ليش ما تسألين نفسج هالسؤال ...عمرج ما راح تحسين باحساسي ... انا طول عمري ضايعه وفاشله في دراستي ..الفرصه الوحيده الي كانت عندي علشان احسن من حياتي و انجح ..انتي دمرتيها ...اي انتي دمرتيها ...و تقوليلي ما عندي قلب ...انتي و ين قلبج يوم ترجيتج تأجلين الامتحان لان امي توه متوفيه..و يومها قلتيلي.. انتي مو اول وحده امها توفى و رفضتي تأجلين الامتحان ... و ين قلبج يوم شرشحتيني جدام الطلبه ..بس لاني شربت ماي بمحاظرتج ..خبرتج ان فيني سكر و محتاجه اشرب ماي علطول..مع هذا نزرتيني و طردتيني بره المحاظره . .. وين قلبج يوم سقطتيني و انتي تدرين ان عندي انذارين من الجامعه ..بسبتج انطردت من الجامعه ..و تقوليلي ما عندج قلب


انفجرت نوره بالبكاء ..شعور غريب اجتاح عبير ..انقلبت مشاعرها من شعور بالسخط و الاحتقار الى شعور بالتعاطف

عبير : لأ لأ و لا عمري ظلمت احد ...انا بس كنت اطبق قوانين الجامعه ...ما سقطت احد الا و اهو يستحق السقوط ...و ما نجحت احد الا و اهو يستحق النجاح ...نوره ..حتى لو انا غلطانه ..لا تعالجين الخطأ بخطأ اشنع منه ..اذا انتي امج ماتت . فأنا ابوي مات و انا بعمرج ...انا حاسه باحساسج ..صدقيني .

توقفت نوره عن البكاء منحنيه رأسها بتجاه ارضية المطبخ ...ساد صمت ...حاولت عبير كسر حاجز الصمت

عبير : نوره ..انتي توج صغيره ..و الحياة طويله جدامج ...تقدرين تعوضين الي انهدم ...لا تضيعين مستقبلج بلي قاعده تسوينا ...نوره اذا انا غلطت ..فراح اصحح غلطتي ..بأني اسامحج على الي سويتي ...نصيحه لا تتهورين اكثر .








و على حين غفله دخل خالد المطبخ ..بيده حقيبه سوداء جلديه ...ذهب باتجاه انبوبة الغاز ..فصل خرطوم الغاز و ترك انبوبة الغاز تبث الغاز ..تأكد من احكام النوافذ جيدا .

تلاقت عيون عبير بعيون نوره ...تبحث في عينيها تفسير لما يحدث ..لكن خالد لم يمهل عبير لتستوعب ما جرى ..موجها لها ضربه قويه على الرأس افقدت وعيها .. قام خالد بفك الرباط ليبدوا ليبدوا الامر كأنه انتحار .



نوره : خالد انت شقاعد تسوي

خالد : مثل ما تشوفين

نوره : بس احنا ما تفقنا ان نذبحها

خالد : و ما تفقنا انها تشوفنا و تعرفنا ..نوره تحركي ..خلصيني.







امسك خالد بيد نوره يسحبها و يحثها على الخروج ..تبعت نوره خالد و هي في حاله من الذهول و الخوف ..و عند مدخل البيت الخارجي ....توقفت نوره فجأه .

خالد : شفيج ... يلا تعالي

نوره : نسيت موبايلي داخل

خالد : لج دقيقتين تروحين و تيينه


بعد مرور ساعه

استفاقت عبير بشكل جزئي ...لتجد نفسها بوسط الصاله ...حاولت ان تسترجع ما تبقى لها من قوه ..و بصعوبه شديده حملت جسدها المنهك متوجه الى غرفة يوسف ...دخلت غرفته لتراه في نوم عميق ..لا شعوريا ايقضته و ضمته بقوه لدرجة جعلته يبكي ..حملت يوسف و ذهبت لغرفتها ...امسكت بالهاتف ...لتتصل على 112

على الطرف الاخر : الو الو

عبير ظلت صامته

على الطرف الاخر : الو الو من معاي

عبير : حبيت ابلغ عن الخدم ... قمت الصبح ما لقيتهم

على الطرف الاخر : لازم تروحين حق اقرب مخفر تبلغين عنهم

ما ان انهت عبير المكالمه حتى اجتاح عبير شعور بالطمأنينه و الرضا..شعور لم تشعر به منذ مدة طويله

19 التعليقات:

Sami يقول...

غير معرف ...مسحت تعليقك بالغلط ياليت تكتبه مره ثانيه ..اذكر انك كتبت " شالسخافه ..اليوم دمك ثقيل " ..مو متأكد من دقة التعليق

q8-lawyer يقول...

للأسف سامي ماتوفقت بتكملة القصه
خليتني وانا أقراها أحس إني قاعده
أشوف فيلم أكشن يتكلم
عن انتقام وجريمه
وما أحب هالنوعيه من القصص
وماتخليت تكون هذي التكمله

بس ماشاءالله توفقت بإسلوب كتابة
القصه خليتني احس إني قاعده
أشوف فيلم

Sami يقول...

لوير ...الظاهر اني وايد متأثر بأجاثا كرستي ...لوووول..ما راح اعودها :))

q8-lawyer يقول...

ههههههه حدك متأثر في اجاثا كرستي :-)
وإ ن شاءالله تشتهر مثله وأحسن منه بعد
وتبيع مليارين نسخه لقصصك البوليسه

رورو الشخبوطه يقول...

الحين اهي حلمانه ولا نوره ساعدتها ؟؟

و بالعكس حلو الاكشن ..

ومشكور..

عبدالله يقول...

صراحة صراحة .. لاتزعل ..

مادري اذا كانت لك محاولات من قبل .. لكن اعجبني الجزء الاول واااااااايد

لكن هالجزء احس فيه شي غلط ..

ننتظر قصة ثانية وحبكة أقوى

BookMark يقول...

وجان فجأة تصير طيبة D:
مو منها من سلندر الغاز

أحسك تتعمد تخرب النهاية


تجربة موفقة

ميمة السبيت يقول...

** مشالله مشالله تدري شنو احلى شي انهاجزئين الحمدالله و الشكر لك يا ربي انها جزئين

الله يعطيك العافية ترى اتغشمر :)

Engineer A يقول...

عاد انا عجبتني القصة .. احس انها حملت رسالة مهمة ووصلتها لنا بهالاسلوب الحلو ..

الانسان يظلم .. يتجبر ويتكبر على الناس ..

يشوف نفسه وبس ودائما ً يفكر بالأنا .. ما يحس بالمعاناة ولا بالظلم او القهر الا اذا طاله .. ومسه ومس احد من اللي يحبهم ويغليهم ..

شوي كانت النهاية يبيلها تضبيط اكثر بس بالنسبة لي اشوفها تجربة حلوة ومحاولة موفقة جداً

بالتوفيق

Shaikha يقول...

سامي استمر ..
نبي نقرا أكثر، قواك الله.
:)

سلة ميوّة يقول...

صباح الورد والنوير


القصة حلوة...اسلوبك سلس و الأحداث شوقتني ...
وفيها رسائل...

انا هنا


دمت بوّد

Sami يقول...

خنقتني العبره ...بعدين راح ارد على واحد واحد ..حسابي معاكم بعدين :)

Sami يقول...

بستثناء رور الشخبوطه و شيخه و سلة ميوه :)

ebtsamh يقول...

والله عجبتني القصه .. والله حلوة

سامي لا تخلي احد ولا تعطي لاحد المجال

يشكك بموهبتك .. والله ماشاءالله عليك

اسلوبك رائع وما فيه ملل

وللامام دائما :)

chandal/danchal!! يقول...

هذي نصيحة غير مباشرة لهيئة التدريس بشراء -جولة كهرباء- والابتعاد عن الغاز الطبيعي

:)

يعطيك العافية سامي

:)

she is me يقول...

وللأمام سر

Engineer A يقول...

حرام عليك انا قلت ان القصة عجبتني ومدحت الاسلوب ليش خليتني مع اللي " حسابهم بعدين" ؟:)

الجودي يقول...

أخ سامي

ببعث لك منديل معطر علشان تشمه و تروح العبرة إلي خانقتك ..
و بكتب عليه القصه حلوة اعجبتني اسلوبك حلو نهايتها ما توقعتها و الشخصية مو غريبه عن الواقع .. ممكن تكون من النوع إلي يمشي على القانون بدون ما تحيد لكن تعاملها مع الخدم يوضح إن شخصيتها جافه ..

طبعا لي هني و المنديل انتهى بس أنا بكمل تبريرك لعدم بكائها في الرد على التعليقات في الجزء الأول كان ناجح جدا بعدتنا وايد عن توقع النهاية في احدى التعليقات استهجنت عدم بكائهاعلى زوجها و إنت رديت لوير ...اعرف ناس يبجون من داخل مو من بره ...

الشخصية إلي رسمتها مو من النوع إلي تبجي من الداخل على فكرة ...

و في ناس من مات مات عن عمرة يعني ما يفرق معاهم إلي بعده و الحياة مستمرة عاااااادي مو القصد إنها تتزوج بعد وفاته لآ القصد إنها ما تحزن عليه ...

شكرا سامي استمر أنا بتابعك حلو :)

غير معرف يقول...

بالعكس روعه والله عجبتني
وفي النهايه ماعلمت على البنت لأنه ماتبي تأذيه زياده :)
والله شخصيتك زينه في البدايه اشوفك تهاوش خخخ طلعت طيب