حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك

عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers

اكون منشكح و مستانس عندما

1) اشرب شاي لا هو حاجم و لا خفيف
2) يمرني صديقي المصري.. نتمشى على شاطى "انجفه" بالبدع .
3) تنحط على الطاوله سلطة " Green Vally" من مطعم Wasabi .
4) احضر ديوان الاسره و يكون عدد الشياب اكثر من الشباب .
5) اكون ضمن نقاش سياسي محوره النائب ضيف الله بورميه و النائب محمد هايف .. و طبعا في هاليوم عشرات الحسنات تنتقل من جانبنا الى جانب هؤلاء النواب .
6) اقرأ اي شي حق الزين و لما ينزل بوست حق حاكي عقالي و بيت القرين .
7) انعزم على صمونة فلافل و عصير كوكتيل .
8) تكون الغرفه بارده و متلحف عدل .
9) لما اشرح مزايا الاي فون حق واحد عنده بلاك بيري .
10) اطلع من الكويت ...و لما ارجع للكويت .
11) اتنقع بالبحر بعد صلاة العشاء بالصيف طبعا .
12) اطلع البر .
13) اكون تحت الشور و الماي يتكتكت فوق راسي .
14) ابوق الكاكاو من مكتب مديري ...كل اييب من " WOw "
15) أشوف رامي


اكون منغث و حالتي حاله عندما

1) اوصل الدوام و اكتشف اني لابس نعال مع دلاق .
2) اصادف بنت لابسه حجاب بقوطي روب او وحده مطلعه بكلتها .
3) اكل بيتزا ..اكتشف بعدها ان فيها لحم .
4) انسى اقرض اظافري .
5) افتح الجريده ..تطلعلي صورة النائب مسلم البراك او الطاحوس .
6) اقعد مع واحد ياكل حب جدامي او واحد يطلع صوت و اهو ياكل .
7) انعزم على عرش بدو ...كوني نباتي ما اكل لحم احمر و البدو معروفين بالكرم .
8) ينفتح موضوع الزواج .. و تييني اسأله من نوع ..انت ليش ليلحين ما تزوجت , متى تتزوج , يلا متى نفرح فيك ,
9) اضطر اني اتكلم وايد .. او اسمع وايد .
10) اتييني صوغه وايد غاليه ...و ما لا داعي تييني بالاساس .
11) ينطلب مني شغله ما اقدر اسويها .
12) اضطر اني اشتري اي شي من ستاربكس .
13) اشوف فيلم نهايته حزينه .

15 التعليقات:

why me يقول...

مساء الخير

اول شي عسى دوم الابتسامه
وثاني شي دام هالاشياء اهي اللي تخليك منشكح ف هذي جدا سهله بسيطه ونقدر نتحكم فيها




وبالنسبه للأشياء اللي اتخليك ماد البوز


ف هذي هم شغلات تقدر تتفاداها الا الشغلات اللي ما تقدر تتحكم فيها مثل لمن اتبطل الجرديه ولا تطر انك تشتري شي من ستاربكس ولا موضوع الزواج والى آخره






السعاده..


تنبع من صفاء النفس والراحه والرضى
ركز على الرضى :)


لمن يكون الانسان راضي .. ف راح يطوف حق سوالف تقثه

so live the mooomennt



have a nice weekend

Rami يقول...

كما جرت العادة ...
ما اطوف أي موضوع حق سامي .. الا معلق عليه !!

يمكن يكون هالشي راجع لاحد الاسباب التالية :
1- لأني احبه واحب كل ما يكتبه .
2- لكوني مدون مغمور واهو مدون له قراءه ومحبينه فبالتالي لابد من قليل من التلزق جود ربي يعطيني ربع ماعطاه .
3- مادري ليش !!

كون ان الموضوع يتعلق في ما يسعد سامي وما يجعله حزين ، ابي اضيف بعض النقاط ( صديقك مرآتك ):

يكون سعيد لما :
1- أقط بدلية جدامه
2- أول ما يطلع من صلاة اليمعة .
3- ياكل فول مال ريوق فندق فور سيزون - شرم الشيخ
4- يقراء كتاب او رواية على يال البحر.

ويكون حزين لما :
1- أتأخر عليه في موعد بسبب نومة راحت علي ( يعصب )
2- يسمع عن اي سالفة فيها معصية او شرك .
3- يمر عليه يوم في البر بدون لا يتسبح ( يتأزم )
4- أول ما يخلص البطاط الي قاعد ياكله.

why me يقول...

4- أول ما يخلص البطاط الي قاعد ياكله.


لووول
مو قلت لك بطيني!


;pp


وشهد شاهد من ربعه مو من أهله ;p

طموحة مملوحة يقول...

نعال مع دلاغ؟؟ افصخ الدلاغ لوووول

طموحة مملوحة يقول...

على سالفة الزواج انا تييني حساسيية وطفح جلدي لمن يقولون لي متى تتزوجين ؟ الي كبرج عندهم عيال من حرتي اقول والي اكبر مني ماعندهم .

ولمن يقولون متى تتخرجين ؟

ولا جم معدلج ؟

يصييير فيني انهيار عصبي ومخي لوول

ma6goog يقول...

جميل

Engineer A يقول...

احلى شي تكرم سالفة النعال مع الدلالاغ :/

انا اكثر شي يتعسني اذا حضرت فيلم ماله قصه! قمة الاحباط :(

وعلى اللي عندهم عادات سيئة بالأكل صج اتنرفز !

والا لما أنسأل سؤال بايخ ومافيه ذرة لباقة "جم معاشج؟" ودي أذبح اللي جدامي وانتحر!! :)

لاحظ اني ذكرت بس الأشياء السلبية الي تضايقني وخليت السوالف اللي تسعدني .. عرب ماكو فايدة نموت على النكد p;

دمت بخير

MSMAAR يقول...

سؤال: ليش ماتزوجت :)
ماحب هالنوع من الاسئله وانا شكو يمكن ظروف

وليش مانحب محمد هايف اشحلاته ريال سيده لايغير مواقفه لاينافق خله التجمع السلفي يدش بالطوفه عراهم تعريه ماصارت ولا استوت بورميه وياك ماابلعه كلش ملش

لالالالاتزوج اشحلات الفراش اتمغط ابروحك ولا اتصبح على وجه المسعده

عازمك على عشي بدو والاصح قبائل

غير معرف يقول...

لوووول ما تسوى على البراك و ربعه الاستجوابات الأخيرة

عروا بعض زملائهم النواب .. و فشلوهم جدام الناس و بينوا تخاذلهم ... أفهم أنه النواب اللي تمت تعريتهم يزعلون من البراك و ربعه .. لكن أنتم ليش زعلانين عليهم مادري !!!

Sami يقول...

Why me تهمة البطيني لابستني ... اكدها رامي ..صعبه انكر هالشي

رامي ... خابزني خباز :) ...الله يرجعك بالسلامه

طموحه مملوحه ... يا كره الي يدس خشمه بشي ما يخصه ..الزواح مساله خاصه .

مطقوق .. من طيبك :)

Engineer A صاجه و الله ...بكل بساطه جوابي راح يكون ( مو شغلك ) حق الي يسال عن الراتب

مسمار .. اتشرف بقبول دعوتك ..لكن بدون عشا :)

غير معرف ..ما اتفق معاك ..وجهة نظر

BookMark يقول...

ياحلات الانشكاح بهالحالات

1 " جاي لا هو حاجم ولا خفيف" << أحلى شي،
8 "لما تكون الغرفة باردة ومتلحف عدل"
وتكون قايلة والدار ظلمة ونور خفيف من ورا الستارة أيبااا << احلى شي نومة الظهر ^_^

و الله يبعد عنكم الغثا

طـيـر يقول...

لما اشرح مزايا الاي فون حق واحد عنده بلاك بيري .
...
لوووووووووووووووووووول
احسها نذاله .. تخليه يتحسر
لان الايفون صج يصفط البلاك بيري
مع اني فالسه منهم كلهم لووووول

^_^

الزين يقول...

i'll be back to comment

:)

الزين يقول...

يسعدني جدا بأن تكون كتاباتي بمثابة المتنفس لك يا سامي

شكرا لك لرقة اطرائك

وعساه دوم المزاج عالي

:)

الوتيــــــــــن يقول...

كم أنت شفاف