سوالف يال

رفيجي قالي سالفه , ودي اشاركم فيها

امس بعد ما مر ياخذ ولده " بو ست سنين " من مدرسته ...و اهو بالسياره دار بينهم هالحوار

الولد : يبه علاوي رفيجي كله يقول سيدنا الحسين ... يبه منو سيدنا الحسين

الاب : احنا سيدنا محمد صلى الله عليه و سلم ....و الحسين حفيد الرسول

الولد : يعني ما نقدر نقول "سيدنا " الحسين ؟

الاب : امبله نقدر نقول سيدنا الحسين .. سيدنا الحسين رضي الله عنه و سيدتنا عائشه رضي الله عنها و كل عيال و زوجات الرسول " رضي الله عنهم "

الولد : يبه الابله تقول لا تيون يوم الخميس

الاب : ليش

الولد : لان الشيعه عندهم عطله ...و رفيجي علاوي يقول انت لاز م اداوم ..انت سني ..يبه شنو يعني شيعه و سنه

الابو تفاجأ من هالسؤال الغير متوقع و اهو بالهعمر

الاب : شوف حبيبي ... الشيعه و السنه مثل برشلونه و ريال مدريد ..يلعبون ضد بعض داخل اسبانيا ..بس بره كلهم ايمثلون اسبانيا

الولد : يبا منو فينا برشلونه ؟

الاب : يلا اذلف زين

عن نفسي ...ما عرفت اني سني الا بعد ما كملت الاربعتش .

متى المفروض يعرف الشخص انتمائه الديني من وجهة نظركم؟

ودي تشاركوني تجاربكم في موضوع ما

الا و هو

ان تظهر عكس ما تبطن

شعور شنيع يتملكك بعد ما تقوم بهالتصرف

مثل

جلد الذات

يتعزز الشعور بالنقم و الحقد

طبعا ما يحوشك هالشعور الا اذا كنت صاحب ضمير حي

متى و وين اضطر امارس هالتصرف

اذا بنجز معامله ...و معاملتي عند واحد حاشاكم حقير

بعض الاحيان مع مديري ...و خاصه لما يكون على حق و انا على خطأ

مع "التي بوي" ابتسمله اذا غلط.. علشان ما يتفل بالكابتشينو و ما يحوس الجاي بصبعه

مع مخلص الجوازات عند الحدود البريه

ما ابي اكمل علشان ما اطيح من عينكم وايد:)

الحين ابي اعرف مواقفكم

ما ابي اجوبه ملائكيه ...مثل انا صريح ..او انا عيبي اني عفويه

____

بعد تسكرت كل الابواب بويهي ...و بعد ما تعقدت العقد اكثر...و بعد ما صارت شرباكه بيني و بين البلديه
لجأت لصديق ينتمي لقبيلة العوزام ...طلبت منه يتوسطلي بأداره وحده ..لكن الله يجزاه خير.. خلصني من ثلاث ادارات و بيوم واحد
تشكرت منه وايد ... لكن اهو حاول يقلل من شأن مساعدته لي و قال ..ما سويت شي و الله لو انت عازمي جان خلصت المعامله بروحك
صاج
لو انا عازمي ...و خوالي رشايده ...و مناسب كنادره ...جان خلصت المعامله و انا بالبيت
انا من هذا المنبر اعرض نفسي للتبني من اي اسره تنتمي لقبيلة العوازم او الرشايد او حبايبنا الكنادره
تكفون تبنوني ..بس اسبوع ..مو مشكله
ترى و الله انا مو متطلب ... يكفي غرفة نوم و حمام خاص ..و هم بعد ما اكل ايدام ...تدرون انا نباتي
للجادين فقط ارسال طلب التبني على عنواني الالكتروني
الشيخ طلال الفهد يقول ابتسم انت قدساوي
و انا اقول ابتسم انت عازمي
ابتسم انت رشيدي
ابتسم انت كندري

اقام النائب احمد السعدون بديوانه ندوه بعنوان " الا الدستور"

و حضرها مجموعه من النواب

الهدف من الندوه واضح من عنوانها

الا الدستور

لحد يقرب من الدستور

مرجعيتنا الدستور

لكن ما حدث بالامس في ديوان السعدون لا يمت الى الدستور بأي صله

و اهني انا اتسائل

شنو تبون بالضبط

دولة مؤسسات ...دولة قانون ..المتضرر يحتكم للقضاء

او

دولة الغاب ... دولة القوي ياكل الضعيف ..دوله الواحد يحتكم بذراعه او بقبيلته

انا اعلم بأن احمد السعدون و بقية النواب المتواجدين بالندوه غير مسؤولين عما جرى بجويهل

و لكن

كان بأمكانهم ايقاف الندوه التي تدعوا لاحترام الدستور بعد وقوع جريمه في حق الانسانيه و الدستور

الان

كل النواب و السياسيين و جماعة "الا الدستور " و المطالبين بالحريات و بخاصه

من حضر هذه الندوه و من نظمها

يجب عليهم ادانة هذا الفعل الاجرامي و الغير دستوري

و على الحكومه القيام بواجبها اتجاه المعتدين و تطبيق القانون عليهم

ما كان على السيد محمد جويهل الذهاب للندوه وهو يعلم بأن اغلب الحضور من خصومه و بخاصه المتضرر من طرحه

مشحون من اسلوبه المستفز