سوالف يال

قال المحشش عادي انا عايش من ايام. ما كان البحر الميت مريض

( بقت الصوره من جريدة الوطن)

اليوم القنوات التلفزيونيه على افا من يشيل

في شي اسمه يوتيوب

و في اختراع يسمونه بلوق

و الجهاز "الداثر" البلاك بيري يقدم برود كاست

و الاي فون ..حدث و لا حرج

و حتى اصحاب الدقه القديمه ما زالوا يستخدمون اس ام اس

و لي يبنا طاري الجرايد الي مثل الهم على القلب ..لازم نذكر الخدمات الاخباريه

و لا ننسى المنتديات و الجرايد الالكترونيه


يعني و انت بالحمام قاعد " و انتو بكرامه "على المرحاض تلبي نداء الطبيعه ..تقدر اتابع


فيصل المسلم و اهو يندد

مسلم البراك و اهو يلعلع

الطبطبائي و اهو يتنهوص

الدقباسي و اهو يتفذلك


الحكومه ما قالت لا تتحجى عن هذا و لا تذكر ذاك

ليش الاصرار على ندوه و تجمع

الظاهر و الله العالم نوابنا تيهم نشوه لي شافوا جمهور و تصفق

و علشان يشبعون نشوتهم ..يعفسون لنا البلد فوق تحت

الي بعرفه اهم يبون العنب و الا الناطور

العنب ..انك تقول رايك بالوسائل الي ذكرتها فوق

الناطور ...انك تبي تستعرض عضلاتك على حكومتك الي موفرتلك من البامبرز الي شخيت عليه الى الكفن الي بلفونك فيه بعد ما الله ياخذ امانتك

انا من حيث المبدأ مو ضد الندوات

لكن اذا ارتأت الحكومه انا الوضع الحالي ما يستحمل تجمعات و ندوات

خلاص في حلول بديله لايصال الراي

اغلب محجبات هالايام مثل واحد رايح مطعم هندي ..يطلب دايت بيبسي مع عيش زعفران مع كاري ربيان مع شوية سمبوسه و يلحفها بحلو "راس مالاي"

الاحزاب الدينيه مثل موظف ياخذ اجازه مرضيه علشان يروح عمره

نواب الحكومه مثل وحدة ودها تييب عيال و بنفس الوقت تبي تحافظ على عذريتها

بعض نواب الدائره الرابعه و الخامسه مثل واحد بعد ما حلب البقره و نشفها ..ذبحها و كل لحمها و مصمص عظامها

المعارضه اليديده مثل ولد لسانه زفر ..صايع ..عاق باهله ..وفي نفس الوقت كل يوم يذكر امه و ابوه بحقوقه عليهم

الحكومه مثل القطوه الي تحاول توزن قطعتين الجبنه من الشاذي الي على يمينها و الشاذي الي على يسارها ..تاكل من هذا و تقرم من ذاك ..لين تخلص الجبنه ..و ترد هوشة الشواذي

بره الموضوع

صورة الاسبوع من نصيب الراقيه بوك مارك ..و الاسبوع القادم ستكون من نصيب الرائعه النور