حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك


عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


اليوم واحد من الشباب عزمني على مندي ....ما يدري الحبيب ان


صار لي تقريبا عشر سنين ما كليت


مجبوس لحم

ستيك

همبرجر

شورما لحم

لزانيا باللحم

هوت دوغ

غوزي

برياني لحم



وثمن سنين ما كليت


مجبوس دياي

اسكالوب دياي

جكن برغر

شورما دياي

دياي مشوي

برياني دياي

كلاب ساندويش

مسحب



و شهرين ما كليت


مطبق سمج



الي بعرفه


شلون تهون عليكم نفسكم تاكلون كائن كان قبل فتره وجيزه


يتنفس مثل ما تتنفسون

يتألم مثل ما تتألمون

يبجي مثل ما تبجون



شلون تهون عليكم نفسكم تلتهمون كائن يتكون من


راس و ايد و ريول و عيون و اذن ..حاله حالكم



شلون تهون عليكم نفسكم تمصمصون عظام كائن بداخله


قلب و مخ و امعاء و رئه ...ما يختلف عنكم



ما تخافون الله

35 التعليقات:

jonoon 3aqel يقول...

السلام عليكم

هذي كائنات... حية... تعذيبها حرام... و التضيق عليها حرام....

لكن

الله اللي حرم علينا اللي فوق... حلل لنا اكلها ...لما تنذبح بطريقة صحيحة..

و الجسم يحتاج البروتين و غيره من هذي الحيوانات...
و اذا كان هذا مبدآك...فأنت حر ...
لكن الله اللي "نخاف "منه... حلل ، و وسع على عبيده ...و لا خلل "ابدا" في اكل لحوم الحيوانات... و لا تناقض "انسانية" اكلها.. و لا مبادئه و لا اخلاقه !!!

عموما،،، اذا انت ما تاكل اللحوم فادعوك "كما دعوتنا" الى ان تراجع قرارك... لا لشئ.... ،و لكن لتلبيه حاجتك و حاجة جسمك "بالحلال" من هذه الحيوانات

تحياتي

le Koweit يقول...

من صجك ولا اتغشمر ؟!!!!!


صراحة اسمحلي انت مو عايش دنيتك :)

ما تاكل لا لحم ولا دجاج ولا سمج؟
ليش عايش اخوي سامي :)

chandal/danchal!! يقول...

البوست يوقف النمو
:P


الله يهدانا ويهداك سامي
اذا الله اللي مسخر الانعام لنا!


انا مراعية مشاعرك ومتعاطفة معاك, بس اذا الواحد بيتم يفكر بهالطريقة بتطلعله سدرة ماش فبطنه
:P

غير معرف يقول...

لوووووووووووووووووووول
من صجك عيل شكلك بعيدالأضحى
ماتجابل ضحيتك ولاتاكل منه

امبييييييييه الحمدلله على النعمه
ناكل دياي ولحم وسمج

بس ماناكل مندي

:)

Shaikha يقول...

لول سامي من صجك؟

AM.SA.CHANNEL يقول...

هههههههههه حسستني إني آكلة لحوووم البشر هههههههههه ..

بلاك هالأشياء حلال تاكلها ..
بس أنا بعد إستويت ما آكل دياي مب عشان الذبح و هالسوالف .. عشان إنه أغلب الدياي أي أغلب كل الدياي ما مصانع اللي ناكلها و يقوولوولنا طازج هذا دياي هرموونات، يعني ديايه تبيض بدون ديج، يخلووونها تبيض بالهرموونا فعشان جي ما آكله و عشان ينظف جسمي من سموسو هالهرمونات لازم تقريبا 4 شهور ماتاكل دياي، و يقوول هالدياي هو السبب في إنه خلا اليوم الشباب يصيرون كأنهم بنات و البنات كأنهم شباب بسبت الهرموونات و ما شاء الله الحين أغلب شي على الغدا دياي ف نسبة الهرموونات بالذات عند الخليجية مرتفعة على ما أعتقد

لووول سويت محاضرة ..

كل سمج زين أحسن عن اللحم و الدياي

Sami يقول...

جنون عاقل ...كلامك صحيح :) لازم اتحرش باكلي اللحوم

لو كويت .. لييش في بطاط و كوسا و طماط و بزاليا و لوبيا و فلافل و فول و باستا و بيتزا ..ويه وايد اشياء

جندله ...لووووووووول اقول ليش انا وايد طويل

لوير ... غداي من دومنيز بيتزا بعيد الاضحى ..لحم ..لا يحوشك ..حتى ما اقعد معاهم على السفره

شيخه ...و الله من صجي ..جربي ما راح تخسرين :))

Sami يقول...

AM.SA.CHANNEL ... شفتي شلون ..و يلوموني ليش ما تاكل دياي :)

بدون تعليق يقول...

ممكن نطبق هالشي في مكان ثاني الا الخليج عندنا .. مرات افكر اصير نباتي بس بعدين افكر شنو باكل كل يوم ؟؟؟

عدس مثلا ؟

عدس وروب بس ؟

انزين عدس وروب وبطاطس شيبس

وبعدين ؟؟

عدس وروب وبطاطس وصالونة خضرة وعيش ابيض ..

زهق !!!!!!!!!

Sami يقول...

انت صير نباتي و انا اسويلك برنامج غذائي مدة شهر ..كل اكله غير عن الثانيه :)

سلة ميوّة يقول...

:)
قلبك رهيّف وكلك احاسيس جياشة ورقّة
والله انك فكرت بهالمخلوقات المسكينة...


مع هذا...

اتعاطف معاك إلا
بمطبق الهامور و مجبوس اللحم..
اتنقصلك لقيمة؟؟
:)

Sami يقول...

سلة ميوه ..الغريب في الامر اني ما اواطن الحيوانات بعيشة الله .. ما ادانيهم ..و خاصه القطاوه و الجلاب

عين بغزي يقول...

ساندويشه مخ خروف و لسان من مطعم دوار العظام و أمورك راح تصير ميه ميه و ترجع تاكل لحم مره ثانيه و تهد هالخرابيط النباتيات :)

Fai9al - Super Kuwait يقول...

عزيزي الله حلل الحيوانات ومايصير تنكر علينا اكلها لأنك تستنكر اكلها :)
الله قال :
« قل أرأيتم ما أنزل الله لكم من رزق فجعلتم منه حراما وحلالا قل آلله أذن لكم أم على الله تفترون »
وبهالمناسبة انا عازمك على حاشي :P

ebtsamh يقول...

أول مره اعرف خليجي نباتي ..

مو من ربعك آنا ..

معاك بكل شيء الا ما احل الله من

الطيبات :)

panadool يقول...

عازمك على باجة

(:

بس تبيها تيس أو خروف

~حَدِيـثُ الفَـجْـر~ يقول...

لووول
كسرت خاطري .. ساعات احس مثل شعورك ان حرام .. وتقلب جبدي .. ويضيق خلقي .. بس افكر ان هذي سنه الحياه .. وتذكر بالابتدائي ما ادري المتوسط .. كان في درس اسمه دورت الحياه او شي جذي ..

فكرت اصير نباتيه بس ماقدرت :(
احب الاكل :(

صراحه الله يعينك
قولنا شلون قررت تصير نباتي وليش .. وشلون كانت بدايتك .. يمكن تلهمنا :)

^_^

الوحده الوطنيــــه يقول...

السمي الحبيب

اشلون عالعصفور و المكنه
مشمولين بالقائمه ؟؟

الخروف و الا العيل اذا ما تسدحه
و تكره بايدك و الا ما تسوى تاكل
من ذبيحه احد ذابحها عنك

ما نخاف الله بشي محلل لنا اياه يا السمي
و الفاصوليا و اللوبه و البزاليا ما تفيد يا سامي

BookMark يقول...

:/
شكلك ما توجب كلش

ميمة السبيت يقول...

** بالاكل اكيد لا يالك مجبوس لحم مع فقع و انت صاكك اليوع من كل صووووب اويليييييييييييييييييييييييي

may يقول...

وما تخاف الله تصير فيجيتيريان!!

شلون تتجرأ تقصص البقدونس
وتقطع الطماط
وتعصر الليمونة
عشان تسوي لك صحن سلطة

ما تفكر إن هذي الخضار كانت قبل شوي تتنفس ومرتاحة في أرضها ..
وكانت تاخذ من الجو ثاني أكسيد الكربون وتعطينا أكسجين

^_^

مجاراة لكلماتك الطريفة

عموما ،، كل ما تشتهي نفسك والبس ما يلبس الناس..

:)

غير معرف يقول...

لا ياشيخ احلف عاد
غريبه

الجودي يقول...

مساء الخير ...

اللحم أنا معاك ما أكله بس الباجي أوكي ما عندي مشكله وياهم ... بس بقولك سالفه يمكن اتغير اشوي من تفكيرك أو حتى اتخليك اتعيد النظر في الموضوع ...

هذا الله يسلمك والحضور الوالد الله يرحمه سووله عملية القلب من كم سنة وايد يعني و عقب ما رجع الديرة قالوا لي المفروض ما ياكل لحم أحمر علشان الكلسترول و الدهون و هالسوالف و عقب تقريبا سنة و نص أبوي طاح علينا و طرنا فيه لدكتوره قالنا الدكتور الريال فيه نقص بروووووتين إنتوا شنو مسوين قلنا له من عقب العمليه ما أكل لحم أحمر قال قلنا لكم لا ياكل لكن مو جذي يعني على الأقل في الشهر مره أو مرتين بالإضافه لبروتين الدواجن والأسماك لآن الجسم يتعب بدونهم الحين شايلك شبابك بس في مراحل العمر المتقدمه تحتاج بروتين حيواني .. هذا عن تجربة عايشتها ..

و هاوشوني عليها كوني المعنيه في أكل الوالد كنت الله يرحمه :(
سوري هذرت عليك بس القصد في النهاية ربي ما يحلل شي إلا لأنه فيه فايده ومايحرم إلا لمضره بالإضافه أكل هالحيوانات يعمل توازن في البيئة

kal ho na ho يقول...

اشفيه العدس والماش والفول وربعهم .. والله اشحلاتهم!!
ترى سهل جدا يصير الواحد نباتي..
خذني مثال..في وقت قعدت تقريبا سنة وشي .. قول سنة وثلاث أشهر ما قربت صوب الثلاثي (لحم-دجاج-سمك)..لأنه (غذائي) الرئيسي الحلويات فما كان عندي مشكلة..

لكن..

من شفت هذيج الهريسة مع لحم العجل وفوقها ذاك الدارسين المصبوب صب.. قلت ياعمي اليوم بس ومن باجر أكمل المقاطعة..

عفوا.. اشقولك باللي ياكلون البيض؟؟ ترى حتى البيض اعيال الدجاجة اللي عانت لين باضتهم المسيكينة..تخيل يا بري حالي؟؟؟؟
:(

عموما.. النباتيين ياكلون بيض وجبن ويشربون حليب المفروض يشربه اعيال المحلوبة-تعبت وأنا أصفصف الجملة-.. تناقض صح؟؟

مع تحيات (نباتية ماتصبر عن الهريس والبرياني)


ودمتم

خاتون يقول...

السلام عليكم

إذا كل هذا ما تآكله شنو تآكل؟؟؟!!!
ذكرتني بأختي على هالكلام

يمكن تعتبرني متوحشة لكن أنا اقول لها دايما هذا يومهم وبعدين حتى احنا نتألم ونبجي ونحب ونكره ونفكر وهاذي الميزة زيادة...لكن بالنهاية نموت ولا شكينا واعترضنا على قسمة الله

على الأقل أهم لمن يموتون ونآكلهم بتصير لهم فايدة أكثر من لو يموتون عادي بعدين لو عاشوا لين يموتون طبيعي شنو بيضيفون للحياة ماراح يعمرون الأرض ولا يهدمون فيها

أهم على الأقل مرتاحين ما عليهم ثقل الأمانة اللي علينا يآكلون ويلعبون ويناقزون ونآكلهم وبعدها لا عليهم حساب ولا عقاب

كلن له دوره بالحياة على الأقل أهم عاشوا لهم سنة سنتين في خرفان أو جيكن ماتوا قبل لا ينولدون

شمعنها النبات محد حاس فيه ترى عنده مشاعر وعقل بس أنه ثابت ولو إمتنعنا عن كل شي احنا بنموت وكل الكائنات بتعيش ولا همها

إلى اللقاء
أتمنى ما أكون سويت إزعاج بمداخلتي كان قصدي طرح وجهة نظر ^_^

Seldompen يقول...

صبـاح الخير ..

والله أول مره أشوف شخص يأيدني بهالفكرة ..

أنا ما آكل لحوم من لمـا كان عمري 10 سنين ..

لنفس اسبابك , ما اقدر اتخيل ان اللي آكله كان حي !!
أستغفر الله ..

ما أحرم شيء احله رب العالمين , وأدري أن حلال ..

بس نفسيتي ما تساعدني , التفكير بس يخليني ما أتحمل اللي ياكلونه ,

وإذا قلت لأهلي يقلون لي لاتحرمين شيء محلل ..

والله ما أحرم .. بس ماا أقدر شسوي بعمري ..

فأن لا آكل لحوم , ولا نبـات ..

يسألوني شنو تاكلين .. !!

ما أدري P:

وأدري أن كل هذا بيأثر في صحتي .. بس ربي المعين ..

غير معرف يقول...

نفس وحدة .. تقول: انتو قاعدين تاكلون كائنات حية
:)

انزين.. والهوت دوج والبرجر والمارتديلا والتركي ..هم بعد؟

بالنسبة لي اذا الويبة مافيها إيدام أعتبرها خرابيط..

she is me

aL-NooR . يقول...

عااااد شتاكل ؟
و ين اتروح مطاعم بالكويت ؟
يعني انا ما آكل سمج و قليل لحم
بس مو قاطعته ....

سؤال صريح @@
ليش في فرق سنتين بينهم ؟

ترى انجاز .. بس ترى حلال و كل شي لخ حكمة حتى لو ما تحبه ... و مثل ما قالت الجودي ترى البروتينات الحيوانية مختلفة اختلاف تام !


شخبار الصور p;
للحين في عروض

Sami يقول...

عين بغزي .... احس اني برجع :)

فيصل ...حاشي ...على جذي انت مفروض فيصل سوبر السعوديه مو الكويت .

ابتسامه ... ويه وايد الي مو من ربعي :)

بنادول ... الي ياكل باجه ما يتحاجه .. في احتمال 99.9% ان تحوشني نزله و صعده معويه :)

حديث الفجر .... ما كانت صعبه بالنسبه لي ..كنت مؤهل اني اخذ هالقرار المصيري ..انشاءالله راح افردلها موضوع خاص :)

الوحدة الوطنيه (عاضه سابقا ) ....مو هذا الي خلاني نباتي :)

بوك مارك ..جان زين :)

ميمة السبت ...بالنسبه لج اويليييييي بالنسبه لي يا لهوييييييييي :)

مي ...لووووووول :)

غير معرف ...والله العظيم :)

الجودي ...الله يعافي البقوليات ..متروسه بروتين ...لا تحاتين مضبطها :).

لا تحسسيني بالذنب ..ترى ما عندي اوبشنز :)..عقبها مقبرة صليبخات :) kal ho na ho

خاتون ...انا ما اكل اي شي كان فيه دم :)

pen seldom ....ما يأثر على الصحه ... كلام دكاترة التغذيه :)

غير معرف ..احنا ربطنا الايدام باللحم ..و هذا خطأ

النور ...احنا نشكل اقل من 5% من الوطن العربي :)

Yara يقول...

أوكي أنا ممكن أتعاطف مع الطيور فقط عشانك
:)

Sami يقول...

يارا ...لووول مو علشاني ..علشانهم

غير معرف يقول...

انا بعد Vegetarian
لكن مو هذي فكرتي ومو هذا السبب

لكن النفس لا تشتهي ان تأكل كائن حي :D

رورو الشخبوطه يقول...

انا مااكله واهو توه مذبوح لا ..

احب اللي من الجمعيه المجمد خخخ <<هذا بالنسبه للدياي..

بس لو ابي اقدر اوقف اكلهم لانه قطعت البيبيسي من 10 سنين ..

وبنفس الوقت انه ماكل غلب انواع الخضار والفواكهه فمقدر اهد الباجي ..

انزين تاكل روبيان وقباقب وخثاق << مادري ينوكل او لا بس سامعه اسمه وقلت خخخ ..

ولا باللسته ؟؟

Sami يقول...

يونيك ..علشان جذي انتي يونيك :)

رورو الشخبوطه ... الحمدالله ان ما عندي مشكله مع الربيان ..اكل السمج بعد لكن بين فتره و فتره :)

سارة يقول...

واللة عبالى عندك سالفة 00 !!!!

يعنى امانة انت شايف كلامك طبيعى

يصدر من انسان طبيعى 000


صار لك ثمان سنين ماناكل 000

مو مشكلتنا لكن تحررم ما حلللة اللة

اعتقد انك فى حاجة الى مراجعة دكتور نفسى وعقلى