حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك


عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers




رسالة أنقلها نصا وحرفيا كما وردت لي بتاريخ 26/12/1990


أخي العزيز رامي :-

////////////////

السلام عليكم ورحمة اللله وبركاته ، أشلونك وأشلون فلان ( يقصد أخوي ) والوالد والوالدة وباقي أخواتك ( يعني ما يبي يذكر اسم خواتي )
عسى أن تكونوا بخير . أنا ولهان عليكم وايد ، وعلى لعب التنس معاك ( يقصد تنس الطاولة ) ، راح أكسر راسك في لعب التنس اذا رجعت الكويت ( شري ) . أشلون أخوك . قوله سامي يطلب منك انك تتعهد بلاتقوله سموية اذا رجعت الكويت . الشي الزين الوحيد هو ان مافي مدارس هني عندنا . لكن انتو تدرسون و ضيقة خلق . كل الي أطلبه منك أن ترسل لي رسالة تخبرني فيها عن أحوالك . كل اصدقائي واقاربي رحلوا عن الكويت . لكني تعرفت على اصدقاء جدد وأنا تقريبا أشوفهم يوميا .كذلك أبوي فلان صنع لنا لعبة حلوة . أرجوا ان نلتقي معاكم قريب ان شاء الله و أخيرا مع السلامة . سلامي للوالد والوالدة وفلان وفلانة وفلانة ( أشوة انك ما قلت اسماء خواتي في البداية ) . ومع السلامة

أخوك سامي

---------------------------------------------------------------

رسالة عطتنياها الوالدة امس ..

أول ما قريتها مت من الضحك .. وعقبها قعدت افكر .. الله يالدنيا .

مرت على سنة الغزو 20 سنة .. جنها امس .

الجميل في الرسالة صدق المشاعر ( عدا موضوع تنس الطاولة )

وبراءة الطفولة ..

سامي وقتها كل صامد في الكويت مع اهله الله يحفظهم ..

في الوقت الي كنا فيها نلعب في مدن الملاهي في احدى دول اوربا .. وعقبها في احدى الدول الخليجية .


عقب قراية هالرسالة .. أكتشفت ان سامي اسلوبه شيق في الكتابة من ايام ما كان عمره 10 سنوات ..

للأمام يا سامي ... والله يوفقك دائما ..

وانا الي بكسر راسك بتنس الطاولة : )

8 التعليقات:

BookMark يقول...

عسى تدوم المشاعر الصادقة
بدون تكسر روس :)

Sami يقول...

عمري كان تسع و نص :)

panadool يقول...

حلو البوست

خصوصا اللى تتعلق بالذكريات
وخصوصا ذكريات الغزو
عاد لو حاط الرسالة الأصلية لجاء البوست جدا مميز

الحمد لله على عودة الكويت لأهلها
والله فكنا منه

le Koweit يقول...

لوووول
حلوه سالفة التنس :)

الله يديم المحبة

esTeKaNa يقول...

قوله سامي يطلب منك انك تتعهد بلاتقوله سموية اذا رجعت الكويت
:))
كسر خااااااااطري
يطلب تعهد واعليه
.
.
وايد حبيت البوست
وحلو احتفاظك بالرسالة
الله لا يعيد الشر،والله يحفظكم ولا يفرقكم يارب

may يقول...

اللـــــه

ماقصرت الوالدة ، محتفظة بالرسالة..

الذكريات الأخوية حلوة..

ياليت مصور لنا الرسالة..

Princess Sarah يقول...

الله
انا أعشـق الرسائل المكتوبة بخط الأيد
و تحتفظ بالورقة
لما تصفر و تعتق .. يا سلام
أحلى شي
و الأحلى ! إن يكون عندك ذكرى ثمينه مثل هذي من هذاك الزمن

إحنا عندنا اشرطة كاسيت:)
فيها رسائل جماعية
الكل قاعدين عن المسجلة و كل من يقول اللي بقلبه :)

تحيـة
:

غير معرف يقول...

الله :)
ونآآآسة و الله
رسالة بريئة حيل و معبرة،
سامي ما شاء الله أسلوب منذ الصغر :p

صراحة بوست يفرح ، و ذكريات حلوه
الله يخليكم لبعض :)

مشكوور