حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك


عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers

دولة صغيرة في مساحتها , كبيره في انقساماتها الفكريه , لكن لو تمعنا اكثر , بنشوف ان احنا تقريبا منقسمين الى مجموعتين .
المجموعة الاولى بسميها مجموعة اصرف ما في الجيب يأتيك ما في الغيب , تجد هذه المجموعه ...
اغلبهم مع اسقاط القروض
اهم نفسهم الي ضد الخصخصه
اهم ما غيرهم الي يمارسون الفرعيات
مجموعه تعلن و بكل بجاحه موقفهم ضد تطبيق القوانين ..مثال على ذلك " لجنة الازاله و ازدواجية الجنسيه "
اهم الى كل شوي مطالبين بكادر على بطالتهم و على سواد ويوهم
اكثر ناس منتفعين من مهزلة العلاج بالخارج و تزوير نسبة الاعاقه
مستذبحين هاليومين على عدم المساس بالدستور


المجموعه الثانيه بسميها مجموعه الفلس الابيض ينفع باليوم الاسود , تجد هذه المجموعه ..
يؤمنون بضرورة تعديل الدستور لمزيد من الحريات
الحريه عندهم تعني المسؤوليه
اهم ضد مبدأ الدوله الريعيه و لذلك تجدهم مع قانون الخصخصه
مؤمنين بضرورة توسيع نطاق مشاركة المرأه
عندهم ممنوع الواسطات و المحسوبيات
اهم مو بس ضد اسقاط القروض انما مع الضرائب لتعزيز روح المواطنة
ضد استنزاف موارد الدوله

و بما اني و بكل فخر انتمي للمجموعه الثانيه , شفت ان الوضوع وايد سهل و ما يحتاج الى صراعات و هواش علشان نثبت ان وجهة نظرنا اهيا الصح

الحل الي تمخض مخي عنه . هو تقسيم الكويت الى ولايتين , ولايه اسمها ولاية الوناسه و الفرفشه تضم المجموعه الاولى و ولايه اسمها ولاية الملاقه و العمل تضم المجموعه الثانيه و ينقسم معاها مجلسي امه و مجلسي وزراء مع ابقاء حكومه مركزيه تحكم الولايتين.

و بما اني صاحب الفكره , فالسموحه للمجموعه الثانيه اني اتكلم بلسانهم . و عليه اقول للمجموعه الثانيه ...

احنا متنازلين عن ثلاثة ارباع مساحة الكويت , مو مشكله راضين بربع المساحه , لا و المجموعه الاولى لهم حرية اختيار الموقع , شيبون اكثر من جذي .

متنازلين عن فيلجا لهم

ثلثين ميزاية الكويت لهم و احنا راضين بثلث الميزانيه

موافقتي للشروط اعلاه مرهونه بحماية تتكفل فيها الحكومه المركزيه لحدودنا من اي عدوان محتمل من المجموعه الاولى او نزوح جماعي .

النتيجه بعد عشر سنوات

ولاية الوناسه و الفرفشه


ولاية الملاقه و العمل

18 التعليقات:

panadool يقول...

تسلم إيدك على هالبوست

مقالة مميزه الصراحة

أهنيك عليها



مبدأيا أنا موافق على الاقتراح المميز
ولكن ستصادفنا مشاكل فنية مثل المطار الميناء وجهاز الشرطة كيف سيتم التقسيم بهم إلا بناء ميناء آخر ومطار ثانى ,

مشروعك يشبة الفيدرالية السويسرية وغيرها من البلدان

تحياتى الحارة يالزميل

غير معرف يقول...

يبون وناسة و بس و أنتم تبون عمل و بس ؟

شفيه الياباني ؟ :)

ما تلاحظ أنك مدحت الناس اللي تقول أنك تنتمي لهم حيل .. و حاولت تسفه وجهة نظر الآخرين حيل ....
أنت سمعتهم يقولون نبي وناسة و فرفشة
و لا هذي من عندك ؟؟ .. أنا صراحة
ما سمعت أحد منهم يقول
هالكلام ..



أتوقع يدخل عليك شخص منهم بعد شوي ..
و يقول لك .. بلا خيبة ..
نصكم بواقين و النص الثاني
عملاء ايران و تتكلمون
عن حب الوطن و العمل
لأجله !!

أرتقوا يا شبابنا ..

وسعوا آفاقكم و أسمعوا وجهة النظر الأخرى
و أتركوا عنكم محاولة التذاكي و كل واحد يسوي
نفسه يعني فاهم الحركة و صايدهم !!

لأنه واضح أنكم مو فاهمين شي ..

وناسة و فرفشة و عمل و مصانع طيارات ههههههه
ضحكتني الله يضحكك بالخير

الوحده الوطنيــــه يقول...

يا انك حسود يا السمي
الديره فيها وايد فلوس
ياخي خل الناس تسترزق الله
و تلهط من هالخير مو بس سراق المال
العام اللي ياخذون حتى اهم بما انهم
كويتيين على قولتهم هم خل يشوفون نصيبهم
:)

عين بغزي يقول...

يعني معناته المجموعه الاولى راح تختار الاراضي التي بها النفط و تسحب علي راحتها و تفسفس بالحلال و انت خلك بالموجموعه الثانيه ولا تنسى انه احتمال تشتغل انت فراش في مكتب احد التجار الي يوظف ولده الغبي مسؤول وانت خلك يا ذكي فراش و صبي عنده ..



هل معقول ؟؟ تبي تقسم هالقسمه ؟؟ ماتصير ياخوي انا اقولك ليش لما تصفي النيه بين جميع البشر واقصد بين جشع التجار و طمعهم و بين حسد الفقاره ونميمتهم اهني فقط تستطيع ان تعمل و الشاطر من يوفق راسين بالحلال :)

خلني اوضحلك اكثر

نحن مع الضريبه مع التنمية البشريه و العمرانيه مع كل شي زين بس تعال قسمهم بتساوي علي الشعب لا تعطي فئه حق كامل و فئه تسلب منها حقوقها ؟؟

و أسف علي التجريح و الإطاله .

غير معرف يقول...

انا ضد هالفكره-ليش!!

لأنه راح يزيد الحقد والحسد
والمشاكل بين الولايتين

وليش ماتفكر بشئ يجمع هالمجموعتين
ويكونون على قلب واحد وهدفهم
الأساسي مصلحة الكويت أولا وأخيرا

Rami يقول...

انة افضل اعيش في ولاية المجموعة الاولى بعقلية واسلوب المجموعة الاولى ..

سامي .. لولا وجود المستهلك ما انوجد التاجر.

BookMark يقول...

واللي بين المجموعتين وين يروح؟

يحطونهم ب (وليية) تصغير ولاية
ويصيرون أكراد؟

غير معرف يقول...

آنا فهمت شتقصد من البوست
انت تقصد ان الفاشل عنده استراتيجية للفشل ومهما عطيته راح يتصرف بالموارد بنفس الطريقة
والعكس بالنسبة للناجح يقدر يأقلم نفسه على القليل ويحقق الخطة اللي جدامه
وسبب مطالبة الفاشل بالزيادات والكوادر اهوه انه ما عرف يمشي حياته باللي عنده وهاذي مشكلته بروحه

أحييك بصراحه بوست حلو

المُهاجر يقول...

هههه والله ما ألومك إبتلشنا بلشة ببعض البشر!

عزيزي، المشكلة بالعقليات اللي مو راضية تنظف وتتحضر (خطين تحت تتحضر) وحسبالهم الكويت كيكة والحين يه دورهم ياكلون منها!

والحل طبعا صعب جدًا الحين ويحتاج سنوات طويلة... بس الأكيد إنه (الحل) يبدأ بالتربية والتعليم الصح وتفعيل مواد الدستور (الحرية وتطبيق القانون أهمها) و زرع مفاهيم الوطنية والعمل الجاد والأمانة وحرية الفكر والتعبير ووو.

Engineer A يقول...

أنا بعد أضم صوتي لصوتكـ ومستعدة عن التنازل للمجوعة الأولى بالمساحة كلها بالمقابل يتركونا نطلع ولاية الكويت مثل الصورة الأخيرة!

دمت بخير

غير معرف يقول...

مشكلتهم ان عقلياتهم عقلية صحراوية ـ اشفط كل الخير وبعدين روح مكان ثاني .. مو قادريين يتطورون ويحسون ان الدولة مفهوم مختلف عن مضارب بني عبس

Rami يقول...

مع احترامي لجميع الاخوان الي علقوا ...
نرفض الاشارة تحديدا الى الاخوان من اهل البادية
فنحن منهم وهم منا ...

الشين موجود ... كان عيمي ، حساوي ، بدوي ، نيدي ، كندري ، عوضي ، زبيري ، فودري ،.. الخ ..

ولا أحد فوق راسه ريشة .

Sami يقول...

بنادول ....اشكرك عزيزي :)

غير معرف ....لووول ...وايد متحامل علي ..ما ادري ليش ..بس الي يشفعلك خفة دمك ..عجبني تعليقك ..كثر منها ..موغشمره من صجي :)

عاضه ..لا تعليق :)

عين بغزه ... هذه الساعه المباركه ...حبيبنا ترى الشغل مو عيب ..لازم ننغير نظرتكم للعمل علشان نرتقي ..شفيها اذا الكويتي شتغل فراش ..على راسنا ريشه

لوير ... احترم رأيك ...ما وصلت من الذكاء الي اقدر القه فكره تجمع المتناقضين :)

رامي ....مصلحجي :)

بوك مارك ...ملاحظه جديرة بالاحترام .. انحطكم في بوبيان :)

غير معرف ...بالضبط هذا الي بغيت اوصله :)

المهاجر .. كلام سليم :)

Engineer A ... ما راح ادخلج بجتماع المفاوضات :)

غير معرف ... وجهة نظر :)

رامي ...محد اشار للبدو و لا حتى بتلميح .. علشان تتحفظ ..ما يصير الواحد كل ما يبدي وجهة نظره لازم يختمها بـ " انا والله ما قصد فلان و علان " ...صفوا النوايا..اووف نرفزتني

alala يقول...

انا من ولاية الملاقة و العمل ... يعني انا مليقة و عاملة (فشلة)

المشكلة ان اللي يشتغل و اللي ما يشتغل في هالديرة نفس الشي و كنت اعتقد ان القطاع الخاص افضل طلع نفس الشي بس على اهون ... و لله الحمد و المنة !!!

Sami يقول...

هلا والله بنت ولايتنا :) دامج افتشلتي من عامله ..عقابا لج راح نخصص لج قسيمه عند الحدود يم ولاية الوناسه و الفرفشه ..علشان يحوشج طشار منهم

Crazy Girl in aGood Way يقول...

عجبني البوست والتعليقات

فكرة حلوة :)

Sami يقول...

الله يسلمج :)

غير معرف يقول...

أممم بما أني أتمتع بصفات الولايه الثانيه و لكن أبي أتهنا بمميزات الولاية الأولى تقرر الآتي:-
أول 4 سنين بعيش بالولاية الأولى بستفيد من كلللل شي
اهما بيخططون خطط فاشله مع انه عندهم ملاييين بس تظل فكرتهم و هدفهم فاشل! و بعدها بييلكم بالولايه الثانيه بس عاد هالله هالله بالاستقبال مو تعصبون مني. بييبلكم غنايم واايده!! و بنتعلم من اللي سووه و نتعظ !

لا لا جد ،
فكره همم حلوه بس تطبق لفتره زمنيه بعدها يرد الحال لما هو عليه ولاية وحده كبيره! لأنه يا أخوي ما ينفه ولايه كلها اغنياء وولايه كلها فقراء الديره ماراح تمشي!

بس تدري جان زين يسوون فيننا جذي كلنا نكون تحت قوانين الولاية الثانيه بدخل محدود.. و الله راح تطلع ابداعات و افكار و راح نشوف تطورات و لا عمرنا تخيلناها تصير بالكويت :)

بس يظل حلم لن يتحقق! عيل شلون التجار بيلعبون بالناس؟

:)
بوست حلو ..
أطلق خيالات خيالاتي