حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك


عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers


وصلنا بالوقت نفسه .. التقينا عند باب المصعد
سامي : صبحك الله بالخير
في الوقت نفسه يرن هاتفه النقال ...يرد عليه ...لم يكلف نفسه رد التحيه .. فقط اكتفى بهز راسه .

نصل للدور العاشر .. و عند صالة الاستقبال نقترق كلن منا لمكتبه

بدأت بتصفح بريدي الالكتروني ..لم البث ان سمعت صوته المزعج ..يأنب سكرتير القسم على خطأ اقترفه .
و بدون استأذان يدخل مكتبي و باسلوب امر يخلو من اللطافه

المدير : سامي .. التقرير الشهري ابيه قبل الاجتماع ..الموضوع عندك

ارد باستغراب من هذا الطلب المباغت .

سامي : تتوقع يمديني اخلصه بهالسرعه ؟؟
المدير : المفروض يمديك !! باقي ساعتين على الاجتماع .

يخرج من المكتب بكل برود ..يطلب من السكرتير رد اي زائر لمكتبي خلال الساعتين القادمتين ... اتسمر في مكاني و قد بلغ مني الغضب مبلغه

شهيق ..زفير ...شهيق ...زفير ..شهيق ..زفير

استغفر الله العظيم .. اعوذ بالله من الشيطان الرجيم

ساعتيين من التركيز الشديد و العمل المتواصل و النتيجه انجاز ربع التقرير

فجاه ايحوشني عقر بقر .. خلاص علي و على اعدائي .. بالطقاق الي يطقه مارح اكمل التقرير .. الحمدالله مو قاصرني شي .. اجابل شغلي الخاص ابركلي .. الكتب الي يوقعها انا الي اكتبها ... اجندة الاجتماع دائما احضرها .. محضر الاجتماع يطلع مني .. التقارير و الدفعات و الدراسات كلها فوق راسي .. مع هذا كله لا حمدا و لا شكورا ... الي احصله بوز ماده شبرين .. و اسلوب يغث الي ما ينغث ..ما انكر ان مديري من الناحيه الفنيه و الاداريه من افضل خمس مدراء على مستوى الكويت في مجاله... و ما انكر انه عادل في تقييمه لي و عمره ما ظلمني اداريا ..و الله الحمد تقييمي دائما مميز .. لكن هذا ما يشفعله اسلوبه الحاد و الجلف .. بالنهايه انا روح احتاج كلمه تشجيع ترفع معنوياتي .. ماني ملزوم اتعامل مع خشبه ..صج ان وضعي بالشركه راح يكون من صالحي بالمستقبل .. لكن ما افتكر اني راح اتحمل كل هالمده ...لازم احط حد اليوم .. راح اسلم التقرير منقوص .. و الي يصير يصير .... بيعطيني كلمه برد بعشر ..و الله مي حاله هذي .

نص ساعه من التحلطم مرت و محد طلب التقرير

نص ساعه ثانيه مرت من التحضير النفسي للملاسن المحتمل و محد طلب التقرير

نص ساعه ثالثه مرت و انا اكتب هذا البوست و محد طلب التقرير

نص ساعه رابعه مرت و انا امارس التنفس العميق و محد طلب التقرير

شهيق ..زفير ...شهيق ...زفير ..شهيق ..زفير

ارفع سماعة التلفون .. اضغط على ارقام مكتب المدير بشكل متثاقل

سامي : الو
المدير : هلا سامي ... نسيت لا ابلغك .. اجلنا الاجتماع باجر ...يلا اكلمك بعدين عندي خط ثاني

طوط طوط طوط طوط

اي الحين اقدر اشتغل على التقرير


13 التعليقات:

الأستاذ مزيكا يقول...

السلام
خلصت التقرير ولا بعد:) المدير ناطرك

شوف مااعتقد احد يحب مديره
مديري السابق هو اللي مخلي صدري مكربن يعني يجيني بالخفاره وياه شيشته اول يوم احراج تكلمه وبعدين يوم السالفه امصخت حطيت استكر على الباب هيكل عظمي ويمها علامة التدخين ممنوع وهم مافاد فيه

واخر الشسهر هواش ويا رئاسة القسم وين تقارير هالصبي..هالصبي مره وحده ...استقاله
والمدير الحالي مايمديه يخلص الشهر ..ويين تقريرك ..هاك عدله مايمشي وياي ..وين ورني اللي اشتغلت فيهم..كاه شوف...شهر وكل هذا شغلك..بعد شسوي

انا اقول كمل تقريرك المدير ناطرك

والكلام يجب ان يكون مطاعا

Sami يقول...

مديرك يشرب شيشه بالدوام !!!....الله يعينك ...و الله هانت علي مشكلتي :)

الزين يقول...

انا جني علقت

هممم

وطار التعليق

دقت الساعة وبروح انام


تطالبني تعليق
واطالب مدونتك الي بلعت تعليقي هاااام تعليق

تصبح على خير

Sami يقول...

انتي من اهله ..لازم اعرف تعليقج !! ..راح ابعث لج صوره من الكتاب الي قتلج عنه على ايميلج الخاص

panadool يقول...

لوووووووووووووول

سامى

الظاهر تشتغل بقطاع خاص وأحمد ربك أن أمورك مرت لهذا الحد

والله لوتشوف مدراء الوزرات ؟؟؟؟؟؟؟؟؟؟؟

خصوصا إذا كان المدير زعول ... أو يحب صوغة السفر

بس وضعك زين ماعليك

وشكرا

why me يقول...

صباح الخير سامي

ترا عادي جدا وتصر وايد وياما مرت علي هالسوالف
سو لا تحط في بالك
شغلك اهو مستقبلك وبالطقاق اللي يطقه .. لازم تستحمل اشوي وتسمع كلامه تالي انت اللي راح تربح مو اهو


انت خبره
مستقبل
ممكن اتحصل اوفر حلو من ورا هالخبره أشياء وايد
اسمع كلامي :)


وكمل تقريرك
;p

الزين يقول...

صباح الخير يا سامي

شوف
مديرك هذا ذكرني بمديري السابق
بس الفرق ان كان واحد حبوب
ومسالم
عبقرى في مجاله
بس ما عنده تركيز
مخه كله مرفع
وفي مكان ثاني
عمره ما كمل جمله
يحتاح واحد يعرف يكمل الفراغات معاه
وينظم شغله
بالمعامله اعطيه الف
بالمرونه نفس الشي
ما يصلح اصلا للعمل مع كويتيين لأن راح يستغلونه

مو هني السالفه
السالفه ان كان على باله عندي العصايه السحريه
واقدر على حل المعضلات اللي يقطني فيها لأن مو مركز بضربة عصا
@@

ويمكن ان علمته على الشغله لأني سريعة البديهه وبسرعة اعرف اتصرف
فصار من يتوهق يطلب منو!!

اللي صار ان هالموضوع مع الوقت شتتني
مسؤولية ترى
صارت لي ظروف مرض
تالي سفر
تالي وفاة
ويمكن انشغلت
وصار البطل وايد يطيح بمطبات
لما ييه وقت التقييم السنوي
خاره معاي
الحييييييين .. على وقفاتي كلها
تنسى وتذكر بس اني بالفترة الأخيره انشغلت
وما كنت معطه العمل حقه 100%
وين التقدير
وين الإنسانية

وانوي له على نيه يا سامي
بوز لمدة اشهر
يعطيني شغل يوصل له بعد اسبوع
كل شي عندي بندنج
الريال طفر
لما ييه كلمني
بكل برود رديت عليه
انا قاعده اعطيك على قد التقييم السنوي اللي عطيتني اياه
@@

طبعا الريال
سكت ومارد
وعقبها ناداني يتعذر لي ان ما حسبها عدل
وان ان شاء الله بيعوضني
وان كان المفروض يقدر ان هالظروف خارجة عن ارادتي

:)
على بالك سكت
نوووووو
قلت له تبي ترضيني
انقلني من عندك
انا ما عندي الرغبة ان اكمل هني بهالقسم
وحتى لو اتم
ماراح اشتغل

شهر
وانتقل ومع درجه بعد
:)

شرايك فيني
اصلح يكون اسمي حصه
:))))

الزين يقول...

:$

واكتشفت ان تعليقي عندك اطول من السي في مالتي

:)

Sami يقول...

Why me ياليت اكون مثلج أخذ الامور بساطه و ما أحملها اكثر مما تحتمل .. الله يكثر من أمثالج :)

الزين ..تعليقج احلى من بوستي .... ودي أشيل البوست و أحط تعليقج ...تصدقين أني متعاطف مع حصه اكثر من فضه.. شخصية حصه تشكلت نتيجة الظروف الي مرت فيها ..الله يلوم الي الومها .

Sami يقول...

بنادول العزيز ... مديري في كل الصفات الزينه ... مشكلته الوحيده انه وايد رسمي .. طبعا لا يقارن مع مدرا الوزارات :)
اقدر أتأقلم لا تحاتي

Rami يقول...

اقولك يا سامي كما قال الامام الشافعي مع بعض التصرف :
أصبر على مر الجفا من مديرك .. فان فشل العمل من نفراته

ومن لم يذق مر الجفوة ساعة ... تذرع ذل الوظيفة طول حياته.

ومن فاتته الخبرة وقت شبابه .. فكبر عليه أربعا لوفاته .

وذات الموظف بالكرف والتعب .... اذا لم يكونا لا اعتبار لذاته.

BookMark يقول...

امممم
تقدر تتغاضى عن الجوانب السلبية
وتشوف الجانب الإيجابي منه

مدير يقدر شغلك ومايظلم .. زين تحصل النوعية هذي

صح احنا مو مجبورين نتحمل تصرفاتهم الي تقلب نفسيتنا فوق تحت .. على قولتك مايتعامل مع خشبة اهوا

بس شنقول .. شي أحسن من شي
عالأقل لما تشوف تقييمك السنوي تنسى الي صار D:

Engineer A يقول...

هههه يلا زين صار عندك وقت لإنهاء التقرير .. عاد عسى خلصته قبل الاجتماع؟ :)

عندنا وعندك خير

الله المستعان :)