حكمة الشهر

ما ينفعك يا كويت بالعسر واللين إلا عيالك وخذي العلم مني

Sewalefyal@

صفحة الفيس بوك


عدد الزوار (Unique)

من نحن ؟

نبش في المدونة !!

قائمة المدونات الإلكترونية

Followers

رحلة استغرقت يوم ونص الى ارض المملكة الحبيبة
لقضاء بعض الأعمال مع بضع ساعات من الاسترخاء على شواطئ احدى المدن الساحلية
في بداية اليوم الأول ..ذهبت لاجراء معاملتين في بنكين من أشهر بنوك المملكة



كانت البداية مع مصرف الراجحي :
دخلت الفرع ...لأجد عشرة من الجنسية الآسوية يجلسون على كراسي الانتظار
ستة بين أخوة مصريين وسوريين .. أربعة خليجيين واقفين على كاونتر الاستقبال
غرفة مدير الفرع ( مليانة ) زوار ومراجعين
وقفت في الطابور على كاونتر الاستقبال لكي آخذ رقم .
وصل دوري في الاستقبال بعد خمس دقايق .. سألني الموظف بكل سعة صدر .. سم
طلبت منه الي ابيه وانة واقف .. حاول يخدمني بكل مايستطيع
الا ان معاملتي نقصها بعض المستندات
الغريب في الموضوع .. ان الموظف كان يقوم بأربعة أشياء في نفس الوقت
1- يمشي معاملتي
2- يطبع كروت سحب آلي
3- يوزع ارقام على المراجعين
4- يجاوب على اسئلة العملاء
الصراحة استغربت من انتاجية الموظف رغم الفوضى العارمة الي كانت تحيط في المكان
الاثاث كان متهالك .. والحوائط مبقعة .. وعدد العملاء يفوق طاقة الفرع الا ان الامور كانت تسير على البركة وبشكل تلقائي ..




طلعت من الراجحي .. ورحت بنك الرياض
شكل البنك من الخارج وايد مرتب .. وكان الشعار ملفت للانتباه
أول ما دخلت .. لقيت شاشة تعمل باللمس على ايدي اليمين
الصفحة الأولى .. تختار نوع العميل ( فرد - شركة - ) الصفحة الثانية تختار نوع المعاملة بالتفصيل .. الصراحة ما قط شفت شاشة بنك في مثل هالتصنيف والترتيب .
سحبت الورقة .. رفعت راسي .. الا ذاك الاثاث الراقي والترتيب العجيب في مكاتب الموظفين
والجميل .. أن الفرع كان يصفر .. مافيه ولا عميل
.. حاولت ادور الرقم بين الشاشات العشر الي معلقة
مالقيت ولا رقم معروض .. كلهم مكتوب عليهم ( شكرا لانتظاركم ) .. التفت يمين ويسار .. وانتظرت ثلاث دقايق على أمل ان يلتفت علي احد من الموظفين اول يقولي تفضل
قررت عقبها اتجه لأي موظف واسئله عن مكان معاملتي ... دورت أسمح ويه فيهم
وقفت يمه ... وسلمت .. رفع راسه وهو مستغرب .. قالي نعم ؟؟
في اللحظة حسيت ان الوضع مو طبيعي وكأني طالب شي غريب ..
قلتله عندي المعاملة الفلانية .. منو يسويها ؟؟ .. قال استريح
انتظرت على مكتبه لمدة 20 دقيقة ... واهو قاعد يطقطق بالجهاز
تتوقعون يا جماعة شنو قاعد يسوي ؟؟؟
الحبيب قاعد يمسح رسائل الايميل الي في جهازه !!!
بكل بساطة .. ممكن انه يأجل هالشي عقب ما يخدمني .. او اذا كان شغله مستعيل يقولي روح حق زميلي الي يمي ..كان يقدر ينجز معاملتي بدون لا يعطلني كل هالوقت ..

الي حبيت اوصله في هالقصتين ... ان الانسان هو العنصر الأهم في عمل أي مؤسسة.
في بنك الراجحي كانت الامور عفوية وماشية على البركة رغم تواضع المكان ..الا أن العنصر البشري كان يعمل باخلاص وتفاني

على العكس من ذلك كان بنك الرياض... المكان راقي والاثاث فاخر والاجهزة ذات تقنية عالية الا ان العنصر البشري كانت تنقصه الخبرة والكفاءة في التعامل مع العملاء

10 التعليقات:

Mohammad Al-Yousifi يقول...

سم

صدقت

Mohammed يقول...

والله هني المشكله المكان يخدعك مرات ,, لكن الخدمه تكون ممتازه حتى لو المكان الله بالخير ,,

تشوف هالشخص اللي يشغل 4 شغلات مع بعض هذا تلقاه مهضوم حقه وماكل ..... ومحد مقدره اما اللي هناك يمسح ايميلات هذاك مريح ومكافآت وشغل عدل
,,
ذكرتني بسالفة اخوي يقولي المطعم اذا برا وصخ تلقا اكله نظيف واللي شكله حلو اكله مو ذاك الزود لووووول

يعطيك العافيه اخوي رامي وتسلم يمينك .

ساره النومس يقول...

مو المهم بالشكل والمظهر المهم بالخدمة

شوف الجهات بالكويت يحاولون يرقعون المباني بس مايقدرون يرقعون نفوس اغلب الموظفين الدنيئة الي يبون معاش بدون تعب وذمة وضمير :)

المهم تخلص معاملتك وارتاح بالبيت لوول

الأستاذ مزيكا يقول...

السلام
ايييه مثل شطارة ونشاط ربعنا
تقعد تنطر ساعتيين وثلاث ساعات وماجدامك الا اثنيين
دلع عندنا

panadool يقول...

الحمد لله على السلامه يا حلو

الزين يقول...

اذا كان الموظف ما عنده تقدير لضياع وقته
شلون تبي يقدر وقتك المهدر والسبه كسله

هالمشكله تشوفها حتى عندنا بالوزارات
ما في احترام لوقت الآخرين
وما في خبرة
يداومون عشان المعاش اخر الشهر
بس شنو اداءهم شنو انتاجيتهم
مو مهم

الفساد الوظيفي والبطالة المقنعه بكل مكان
بنك
وزاره
مؤسسة حكومية
وعمرك لا تحكم على المنظر

مساك الله بالخير

عين بغزي يقول...

اذا اهملنا دور الفرد في العمل تكون النتيجة موظف بنك الرياض

اسأل الله ان يسمح امورك و يخلص معاملاتك بالسرعه الممكنه :)

enter-q8 يقول...

لذلك نقول ان يجب على الدولة ان تهتم بالعنصر البشري
احنا دولة مستورده فمالحال لو اصبحنا دولة مصدرة للموارد البشرية

Rami يقول...

مطقوق : سم الله عدوك :)

محمد : هالكلام ينطبق على مطعم التباب وبرقان وساكت عجيب ..

طموحة : صاجة :) وخاصة وزارة الشؤون

مسمار : والله يا زين ربعنا ... شقردية :)

بانادول : الله يسلمك يا جميل

الزين : صاجة :)

عين بغزي : أجميعن

انتر : نستورد الردي من موارد غيرنا البشرية
وهالردي بدال ما يفيدنا .. يضرنا

why me يقول...

عدل كلامك



صباحك مطر:)